डा. भट्टराईको सुझाव :पूर्व राजा, पारस र हिमानीलाई पनि चुनावमा उठाए हुन्छ
समाजवादी पार्टी नेपालका अध्यक्ष डा. बाबुराम भट्टराईले पद चाहिए दल खोलेर चुनाव जितेर देखाउन पूर्व राजा ज्ञानेन्द्र शाहलाई सुझाव दिएका छन् ।
पूर्व प्रधानमन्त्री समेत रहेका डा. भट्टराईले केहि जनताले टीका थाप्दैमा राजतन्त्र नफर्किने र फर्किएको सपना नदेख्न समेत पूर्वराजा शाहलाई चेतावनी दिए ।
गृह जिल्ला गोरखा सदरमुकाममा आज (बिहीबार) समाजवादी पार्टीले आयोजना गरेको दशैं, तिहार र छठको शुभकामना आदाप्रदान तथा चियापान कार्यक्रमलाई सम्बोधन गर्दै अध्यक्ष भट्टराईले जातीय र वंशीय परम्पराका आधारमा देश चलाउने प्रथाको अन्त्य भइसकेको बताएका छन् ।
उनले भने, ‘राजतन्त्र कुनै पनि हालतमा फर्कदैन । जातीय र वंशीय परम्पराको अन्त्य गरेर गणतन्त्र ल्याएका हौं, अब पछाडि फर्कने ठाउँ छैन ।’
अध्यक्ष भट्टराईले देश चलाउने इच्छा जागेको भए दल खोलेर चुनावी मैदानमा ओर्लन समेत पूर्वराजा ज्ञानेन्द्रलाई चुनौती दिए । उनले भने, ‘पारस र हिमानीलाई पनि चुनावमा उडाएर जित्नुस्, हामीलाई कुनै आपति हुँदैन ।’
उनले देश नयाँ यात्रामा रहेको हुँदा विकास र समृद्धिका लागि सबै दलहरुबीच सहकार्य र एकताको खाँचो रहेको औंल्याए । यस्तै डा. भट्टराईले आफूहरुको संविधान संशोधनको मागलाई सरकारले सुुनुवाइ नगरेको भन्दै सरकार छाड्ने तयारीमा आफूहरु रहेको बताए ।
