‘नेपाली क्रिकेटको अबको यात्रा विश्वकप’

 

निस्कृय अवस्थामा रहेको नेपाल क्रिकेट संघ (क्यान) ले शनिवार पुनर्जीवन पाएको छ । स्वतन्त्र कमिटीको समन्वयमा सम्पन्न क्यान निर्वाचनले ४ वर्षका लागि चतुरबहादुर चन्दलाई जिम्मेवारी दिएको छ ।

अध्यक्षका अर्का प्रत्यासि विनयराज पाण्डेलाई २९ मत अन्तरले पराजित गर्दै क्यानको अध्यक्षमा निर्वाचित भएका चन्दले आउने दिनहरु निकै चुनौति पूर्ण रहेको बताएका छन्

चुनौति नहोस् पनि किन ? ३ बर्षभन्दा लामोसमय प्रतिवन्धमा रहेको संस्थालाई पुन : स्थापित गर्नु पर्नेछ । त्यसैमाथि अन्तर्राष्ट्रिय क्रिकेट परिषद् (आईसीसी) को निलम्बनमा रहेको क्यानलाई फुकुवाका लागि प्रकृया अगाडि बढाउनु पर्नेछ ।

निलम्बन फुकुवाले मात्रै पनि अहिलेको अवस्थामा केही हुनेवाला छैन । आईसीसीले भनेको जस्तो आर्थिक पारदर्शिता, सुशासन लगायतका कुराहरुमा क्यानले सही तरीकाले अगाडि बढ्नु पर्ने अवस्था छ ।

‘क्यानमा निर्वाचित भइरहँदा चुनौति छ । नेपाली क्रिकेट प्रेमीहरुको अपेक्षा यो टिममाथि छ । अब नेपाली क्रिकेटले नयाँ तरिकाले निकास पाउँछ, नवनिर्वाचित अध्यक्ष चन्दले भने,‘अब क्यान विवादरहित तरिकाले अगाडि बढ्छ । त्यसमा नेतृत्व खरो उत्रिनेछ । यो जितमा हामी उत्साहित हुनेभन्दा पनि जिम्मेवारीलाई लिएर सजग छौं ।’

अघिल्लो कार्यकालमा निर्वाचित भएपनि काम गर्न नपाएका चन्दले नेपाली क्रिकेटको निकासका लागि पछिल्लो ३ बर्षमा झण्डै ४५ भन्दा बढी बैठक बसेको दाबी गर्दै आएका छन् ।

५९ जना मतदाता रहेको क्यानमा अध्यक्ष निर्वाचत भएका चन्दले ४५ मत ल्याउँदा विपक्षी पाण्डेले १५ मतमात्रै प्राप्त गरे । त्यतिमात्रै होइन्, उपाध्यक्षा राजुबाबु श्रेष्ठ, सचिवमा असोकनाथ प्याकुरेल र कोषाध्यक्षमा रोशन सिंह पनि चन्द प्यानलबाटै निर्वाचित भएका छन् भने सदस्यमा उनी निकट व्यक्तिहरु आएका छन् ।

पूरै कार्यसमिति आफुले चाहेका मानिहरु आएका कारण क्यानको आन्तरिक काममा चन्दलाई सहज हुनेछ । तर, यतिबेला आईसीसीको प्रतिबन्ध फुकुवा गर्नु र आईसीसीलाई क्यानप्रति पूर्ण विश्वस्त पार्न सक्नु नै चन्दको कार्यसमितिको मुख्य चुनौति हुनेछ ।

त्यसोत, चन्दले साथीहरुको मायाले नै यहाँसम्म आइपुगेको र उनीहरुलाई निराश नपार्ने प्रतिवद्धता पनि जनाइसकेका छन् ।

यसअघि सरकार र आईसीसीले क्यानमा शुसासनको कुरालाई महत्वपूर्ण ‘इस्यु’ बनाएको थियो । तर, आगामी दिनमा त्यस्तो गुनासो आउने वातावरण नहुनेसमेत चन्दले बताएका छन् ।

‘आर्थिक पारदर्शिता र शुसाशनका लागि म पहिलो दिनदेखि प्रयास गर्छु,’ चन्दले अगाडि भने,‘नेपाली क्रिकेटमा अबको पहिलो सपना भनेको विश्व कप क्रिकेट खेल्नु हो । त्यसका लागि एकदिवसिय अन्तर्राष्ट्रिय मान्यता (ओडिआई) कायम राख्दै अर्को चारबर्ष अधिकतम सदुपयोग गर्ने लक्ष्य छ ।’

विश्व क्रिकेटमा नेपाल एक इमर्जिङ टोली भइसक्यो भन्ने विश्व क्रिकेट जगतलाई चिनाउने लक्ष्यसमेत चन्दले सुनाएका छन् । यस्तै, नेपाली क्रिकेटलाई घरेलु संरचनामा बलियो बनाउँदै अगाडि आउने उनको भावी योजना रहेको बताएका छन् ।

‘अहिले देश संघीयतामा गएको छ । यसअघि हामी क्यानमा आउँदा संघीयता थिएन । तर, अबका दिनमा प्रादेशीक संरचना बलियो बनाउँदै प्रदेश क्रिकेट संघलाई सक्रिय बनाउने योजना छ,’ चन्दले भने,‘एकदिवसिय क्रिकेटमा हामी कमजोर भइसकेका छौं । अब त्यसलाई बलियो बनाउनका लागि तल्लो तहबाटै उमेरसमूहका प्रतियोगिता आयोजना गर्दै हामी घरेलु संरचना बलियो बनाउँदै अगाडि बढ्छौं ।’

पछिल्लो ४ वर्षमा नेपालमा एकदिवसिय क्रिकेटमा प्रधानमन्त्री कप क्रिकेट हुने गरेको छ भने टि–२० मा नीजि क्षेत्रबाट संचालन भएका फ्रेन्चाईज लिगले धानिरहेको छ । तर, अध्यक्ष चन्दले छिट्टै क्यानले आफ्नै आयोजनामा लामो फर्म्याटका प्रतियोगिता आयोजना बताएका छन् ।

उनले ‘टुडे’ क्रिकेटलाई प्राथमिकताका साथ अगाडि बढाउने बताएका छन् । ‘टुडे’ क्रिकेट शुरु भएको १२ बर्ष नै भइसक्यो । तर, पछिल्लो समय यो रोकिएको छ । अब यसलाई पुन सुचारु गछौं,’ चन्दले संरचना आवश्यक रहेको बताउँदै अगाडि भने,‘ ‘टुडे’ क्रिकेट आयोजना गर्न संरचना आवश्यक पर्छ । त्यसलाई काठमाडौंमा मात्रै केन्द्रीत गरेर पनि हुँदैन । घरेलु प्रतियोगिताहरुलाई अन्य ठाउँमा गछौं ।’

क्यानले नयाँ कार्यसमिति पाएपनि तत्कालै नेपाली क्रिकेटको चावी आफ्नो हातमा आइनसकेको अध्यक्ष चन्दले बताएका छन् । अक्टोबर १३ मा आईसीसीको बैठकबाट हुने निर्णय पछि मात्रै संघको जिम्मा आफ्नो पक्षमा आउने चन्दले बताएका छन् ।

‘अनौपचारीक रुपमा हामीले अबको पहिलो निर्णयका रुपमा आईसीसीलाई निलम्बन फुकुवाका लागि निवेदन लेखेर पठाउनु छ,’ चन्दले भने ।

आईसीसीलाई उसले दिने आर्थिक सहयोगको विषयमा पनि नयाँ कार्यसमितिले आईसीसीलाई ‘कन्भिन्स’ गर्दै आगामि दिनमा विवाद हुने खालका काम गर्दैनौं भनेर स्पष्ट पार्ने उनले बताए ।

निर्वाचनबाट आएको कार्यसमितिलाई आईसीसीले शंकाको नजरले हेर्छ कि भन्ने प्रश्नमा अध्यक्ष चन्दले भने,‘आईसीसीले कुनै व्यक्तिलाई हेरेर काम गर्ने होइन संस्थासँग काम गर्ने हो । यसमा हामी सही तरिकाले अगाडि बढे आईसीसीले सहयोग गर्छ ।’

अहिले नेपाली क्रिकेटलाई चलायमान बनाएका टि–फ्रेन्चाईज लिगहरु विधान अनुसार चलेको खण्डमा क्यानले कुनै पनि लिगलाई अवरोध नगर्ने उनले बताए । तर, चन्दले यही वर्ष क्यानले नेपाल प्रिमियर लिग (एनपीएल) को आयोजना गर्ने बताएका छन् । ‘एनपीएल हुन्छ । यो अरु भन्दा ठूलो लिग हुन्छ । यसले नेपाली खेलाडी र क्रिकेटमा नयाँ फड्को मार्ने छ ।’