मुख्यमन्त्री शाही नक्कली फेसबुकले हैरान
कर्णाली प्रदेशका मुख्यमन्त्री महेन्द्रबहादुर शाही नक्कली फेसबुक अकाउन्टले हैरान भएका छन् । त्यसबाट चरित्रहत्याको प्रयास भइरहेको मुख्यमन्त्रीको सचिवालयले जनाएको छ ।
उनका प्रमुख स्वकीय सचिव खेमबहादुर सिंहले प्रेस विज्ञप्ति जारी गरी नक्कली फेसबुक अकाउन्टको भ्रममा नपर्न आग्रह गरेका छन् । ‘सामाजिक सञ्जालको दुरुपयोग गर्दै माननीय मुख्यमन्त्रीज्यूको चरित्रहत्या गर्ने तथा आफ्नो व्यक्तिगत स्वार्थ पूर्तिगर्ने उद्देश्यका साथ नक्कली आर्इडीबाट विभिन्न व्यक्ति तथा निकायमा च्याट सम्पर्कमार्फत अवाञ्छित निर्देशन तथा माग गर्ने गरिएको पाइएको छ’, विज्ञप्तिमा लेखिएको छ, ‘यस्तो क्रियाकलापको भ्रममा नपर्न सरकारी तथा गैरसरकारी निकाय, शुभचिन्तक तथा आम जनसमुदायसँग अनुरोध गर्दछौँ ।’
स्वकीय सचिवालयले त्यस्ता व्यक्ति पहिचान गरी कानुनी कारबाही प्रक्रिया अघि बढाउन सम्बन्धित निकायमा जानकारी गराइसकिएकोे जनाएको छ । मुख्यमन्त्रीको व्यक्तिगत फेसबुक अकाउन्टको लिंक महेन्द्र डट शाही डट १६५ रहेको जनाइएको छ । यसबाहेक उनको नाम जोडेर चलाइएका अन्य आर्इडीको विश्वास नगर्न सचिवालयले आग्रह गरेको छ ।
