कांग्रेससँग एजेण्डा नभएपछि ‘सी बिचारधारा’को विरोध
‘सी बिचारधारा’लाई लिएर अनावश्यक विवाद खडा नगर्न प्रधानमन्त्री केपी ओलीका राजनीतिक सल्लाहकार डा.राजन भट्टराईले बताएका छन् ।
चीनका राष्ट्रपतिको बिचारधारामा सत्तारुढ नेपाल कम्युनिस्ट पार्टी (नेकपा)का नेताहरूलाई प्रशिक्षण गरिएको उनले बताए । ‘जनता जान्न चाहन्छन्’ नामक टेलिभिजन कार्यक्रममा बोल्दै डा.भट्टर्राइले चीनको विकासको मोडल नेपालमा भित्र्याउन खोजिएको बताए ।
उनले मुलुकलाई चिनियाँ मोडलमा लैजाने हल्लामा कुनै आधार नभएको बताए । डा.भट्टराईले भने, ‘हामी संविधानअनुसार अगाडि बढेका छौँ । चिनियाँ मोडलको व्यवस्था यहाँ आउँदैन । हामी बहुदलीय व्यवस्थाको पक्षमा छौँ ।’
नेपाली कांग्रेसले सी विचारधाराको विरोध गरेकोमा सल्लाहकार डा.भट्टराईले भने, ‘नेपाली कांग्रेससँग एजेण्डा छैन । एजेण्डा बिहीन भएको कांग्रेसले अनावश्यक विरोध गरेको मात्रै हो ।’
चीनको बीआरआई प्रोजेक्टमा नेपाली कांग्रेसका तत्कालीन सभापति शेरबहादुर देउवा प्रधानमन्त्री भएको बेला सम्झौता भएको डा.भट्टराईले बताए ।
‘बीआरआई शेरबहादुर देउवा प्रधानमन्त्री भएको बेला सम्झौता भएको हो’, उनले भने, ‘यो सरकारले बीआरआईको सम्झौतालाई कार्यान्वयन मात्रै गरेको हो ।’
