सिंगापुरमा प्रमुख सल्लाहकार रिमाल ‘आउट’, उपाध्यक्ष गौतम ‘इन’!
सिंगापुरको नेश्नल युनिभर्सिटि हस्पिटलमा गत भदौ ५ गतेदेखि उपचारारत प्रधानमन्त्री केपी शर्मा ओलीलाई भेट्न नेपाल कम्युनिष्ट पार्टी (नेकपा)का प्रस्तावित उपाध्यक्ष बामदेव गौतम बुधबार सिंगापुर पुगेका छन् ।
प्रधानमन्त्रीका प्रमुख राजनीतिक सल्लाहकार विष्णु रिमाल स्वदेश फर्किएलगत्तै गौतम सिंगापुर पुगेका हुन् । अघिल्लो दिनै जान खोजेका गौतम अर्को दिन रिमाल फर्के लगत्तै जानुलाई प्रधानमन्त्री ओली र नेता गौतमबीच गोप्य कुराकानी हुन सक्ने अनुमान गरिएको छ ।
कतिपयको बुझाइमा सल्लाहकार रिमाल सिंगापुरमै हुँदा गोप्य कुराकानी गर्न असहजता ठानेर गौतमले यो कुराको छनक महासचिव विष्णु पौडेलमार्फत प्रधानमन्त्री ओली समक्ष पुर्याएको बताइन्छ । महासचिव पौडेलले प्रधानमन्त्री ओलीसँग कुरा गरिसकेपछि गौतमलाई सिंगापुर बोलाइएको थियो ।
स्वदेश फर्केपछि कामको व्यस्ता र धपेडिका कारणले आन्तरिक कुराकानी गर्न सम्भव नहुने देखेपछि पार्टी सञ्चालन र सरकारको आगामि रणनीतिको विषयमा गम्भिर छलफल गर्नका लागि ओलीले नेकपाका दुई हस्ति गौतम र पौडेललाई आफू स्वदेश फर्किनु अगाडि सिंगापुर बोलाएको चर्चा छ ।
यी तीन नेताबीच केही मन्त्रिहरुको फेरबदल, कतिपय रिक्त आयोगहरुको पूर्ति, आउँदो मंसिर १४ मा हुने उपनिर्वाचन र उक्त उपनिर्वाचनमा कास्की २ बाट गौतमलाई उठाउने विषयमा छलफल भएको स्रोतले बताएको छ ।
