गगन थापाले संसदमा भने बिरामी प्रधानमन्त्रीलाई आराम गर्न दिनुस्
प्रतिपक्षी दल नेपाली कांग्रेसका सांसद गगन थापाले प्रधानमन्त्री केपी शर्मा ओलीको स्वास्थ्य अवस्थाबारे संसदलाई जानकारी नगराइएको भन्दै प्रश्न उठाएका छन् ।
सांसद थापाले सत्तारुढ दल नेपाल कम्युनिष्ट पार्टी (नेकपा) लाई बिरामी प्रधानमन्त्रीलाई आराम गर्न दिन पनि आग्रह गरे । बुधबारो प्रतिनिधिसभा बैठकमा बोल्दै थापाले भने, ‘कम्युनिष्ट पार्टीका साथीहरूले धेरै पटक प्रधानमन्त्रीलाई बा भनेर सम्बोधन गरेको सुनेको छु, प्रधानमन्त्री बा सरह हुनुहुन्छ । हामी हाम्रो बा बिरामी हुनुभएको भए के भन्थ्यौं ? बा धपेडी नगर्नुस्, आराम गर्नुस्, विश्राम गर्नुस् । हामी हाम्रो बालाई त्यसो भन्छौं तर, हाम्रो प्रधानमन्त्री बालाई किन यसो भन्न सक्दैनौं ?’
सत्तारूढ नेकपामा प्रधानमन्त्री हुन इच्छा राख्ने र पहिला पनि प्रधानमन्त्री भइसकेका धेरै नेताहरू भएको उल्लेख गर्दै उनले बिरामी प्रधानमन्त्रीलाई पार्टीले विश्राम दिनुपर्ने बताएका छन् ।
‘प्रधानमन्त्रीलाई विश्राम गर्न दिनुस्,’ उनले थपे, ‘कार्यकारी प्रमुख एकै पटक लामो समय बाहिर बस्दा राष्ट्रिय सुरक्षा कूटनीतिक मर्यादा जोखिमको प्रश्न छँदैछ । भिडिओबाट मन्त्रीसँग कुरा गरेर शासकीय जिम्मेवारी पूरा हुन सक्दैन ।’
प्रधानमन्त्री ओली अहिले उपचारका लागि सिङ्गापुरमा छन् । १२ वर्षअघि मृर्गौला प्रत्यारोपण गरेका ओलीमा अहिले मृगौलासम्बन्धी एन्टिबडी बढी भएको छ ।
गत साउनमा उनी पहिलो पटक उपचारका लागि सिङ्गापुर गएका थिए । पहिला थाइल्याण्डको बैंककमा नियमित फ्लोअप गराइरहेका प्रधानमन्त्रीले सिङ्गापुरमा उपचाररत छन् । प्रधानमन्त्री भदौ ५ गते सिङ्गापुर गएका हुन् ।
प्रधानमन्त्री लामो समय विदेश भएकाले उनले भिडिओ कन्फ्ररेन्सबाट मन्त्रीहरूसँग छलफल गर्ने गरेका छन् । प्रधानमन्त्री शुक्रबार स्वदेश फर्किने कार्यक्रम छ । ओलीले सचिवालय सदस्य वामदेव गौतमलाई पनि सिङ्गापुर बोलाएका छन् । गौतम बुधबार सिङ्गापुर गएका छन् ।
