मन्त्री बास्कोटाले भने प्रेस स्वतन्त्रताको नाममा गणतन्त्रलाई चुनौती दिने कार्य स्विकार्य छैन

 

सरकारले प्रेसलाई नियन्त्रण गर्ने खालको तयारी थालेको छ । पछिल्लो समय सामाजिक सञ्जालमा समाजले पचाउन नसक्ने खालका विषयहरु आउँने गरेका छन् । समाचार परिवारसँगै बसेर हेर्न सक्ने अवस्था छैन । यो बीचमा सरकारले सञ्चारलाई खुल्ला छोड्ने भन्दा पनि नियन्त्रण गरेर लैजाने तयारी थालेको हो ।

सञ्चार तथा सूचना प्रविधि गोकुल बाँस्कोटाले संविधान प्रदत्त प्रेस तथा अभिव्यक्ति स्वतन्त्रतालाई कमजोर बनाउने विषय मिडिया काउन्सिल विधेयकमा नरहेको बताउनु भएको छ । राष्ट्रिय सभाको आजको बैठकमा विधेयकमाथि विचार गरियोस् भन्ने प्रस्तावमाथिको छलफलमा सांसदरुले उठाएको प्रश्नको जवाफ दिने क्रममा मन्त्री बाँस्कोटाले यस्तो बताउनु भएको हो । प्रेसलाई व्यवस्थित र मर्यादित बनाउनका लागि सरकारले विधेयक ल्याएको उहाँको जिकिर छ ।

लोकतन्त्र गणतन्त्र स्थापित नहोस्, भद्रगोल होस् प्रणालीले काम नगरोस् भन्ने तहबाट हुने बाहय हमलाहरु र मिडिया आफै बहकिएर स्वतन्त्रताको नाममा स्वच्छन्दता गरेको कुरा स्विकार गर्न नसकिने उहाँले बताउनुभयो । उहाँले प्रेसको परिभाषाभित्र अनुबन्धित गरेर जान खोज्ने कुराले प्रेसको विश्वसनीयतामाथि प्रश्न उठाएको र त्यो आन्तरिक चुनौती रहेको भन्दै सबै चुनौतीको सहज व्यवस्थापन गर्ने सोचमा आफुहरु रहेको बताउनुभयो ।

नागरिकले प्रेसप्रति विश्वास गर्ने दृष्टिले मर्यादा र सीमालाई सोचेर सरकारले विधेयकमा केही त्यस्ता व्यवस्था गरेको बताइएको छ । स्वतन्त्र प्रेसको नियन्त्रण लोकतन्त्रको मूल्य पद्धतिभित्र नपर्ने विषय भएको भन्दै उहाँले सरकारले कानुनी नियमन र स्वनियमनलाई विधेयकमा उठाइएको कुरा स्पष्ट पार्नुभयो । कारबाही प्रक्रियाको बारेमा उजुरी, जाँचबुझ, मिलापत्र, स्पष्टीकरण अनि क्षतिपूर्ति वा जरिबानाका विषय राखिएको भन्दै उहाँले क्षतिपूर्ति र दण्ड जरिबानाका कुरालाई अदालती प्रक्रियामा लैजान सकिने कुरा उल्लेख गर्नुभयो ।

पछिल्लो समय पत्रकारिताभन्दा पनि मिसनकारितामा मिडियाको प्रयोग भइरहेको गुनासो गर्नुभयो । अहिले अचम्मका प्रवृत्ति देखिएको भन्दै उहाँले स्वतन्त्र प्रेसको नाममा हुने लोकतन्त्र विरोधी कार्यलाई स्वीकार गर्न सरकार तयार नभएको जिकिर गर्नुभयो । संसदमा उहाँले भन्नुभयो, ‘जसलाई जे पनि भनेको छ । जे पनि आरोप लगाएको छ । जवाफदेहिता छैन । उत्तरदायित्व छैन । संविधान खारेज गरौँ । संशोधन होइन खारेज । समाप्त गरौँ । अर्को चिज ल्याऊँ ।

यो पनि पत्रकारिता हो ?’ उहाँले अगाडी थप्दै भन्नुभयो, ‘यसलाई अलिकति नियन्त्रण गर्न खोज्यो भने प्रेस स्वतन्त्रतामाथि धावा बोल्ने ? यो त्यस्तो हो ? म सोध्न चाहन्छु । भन्न पनि चाहन्छु । हिजो निरकुंश कालमा जय जय गान गाएर हिँड्ने त्यसको विषयमा केही बोल्न नसक्ने त्यसका विरुद्ध लडेर आएको शक्तिलाई चाहिँ अथ्र्यौकै गर्नका निम्ति यो चाहिँ लोकतन्त्र ? लोकतन्त्र लोकतान्त्रिक व्यवस्थाको रक्षाका निम्ति हो । त्यसको समाप्तिका लागि त्यो छुट दिन सकिन्न । सकिन्छ र ?’ तानाशाही व्यवस्थामा नबोल्नेले अहिले गणतन्त्र आफूले ल्याएको दाबी गर्दै त्यस विरुद्ध विभिन्न वक्तव्य बाजी गर्दै हिँडेकोमा पनि उहाँले आपत्ति जनाउनुभयो ।

उहाँले राजतन्त्रका पक्षधरहरु प्रेस स्वतन्त्रताको नाममा लोकतान्त्रिक व्यवस्थालाई समाप्त पारेर फेरि जाग्न खोजेको उहाँको आरोप छ । कहिले देश टुक्राउन आउ । कहिले गणतन्त्र समाप्त गर्न आउ । कहिले के गर्न आउ भनेर गणतन्त्रलाई खुल्ला चुनौती दिन खोज्ने प्रवृति बढेकोमा दुःख व्यक्त गर्नुभयो । फरक प्रशंगमा नेताहरुको मानमर्दन गरी स्थापित प्रणालीलाई नै समाप्त पार्ने विषयलाई स्वतन्त्र प्रेसको रुपमा परिभाषा गर्ने विषय सरकारलाई मान्य नभएको बताउनुभयो ।