नेविसंघको नेतृत्व टुंग्याउने अन्तिम कसरतमा कांग्रेस
प्रमुख प्रतिपक्ष दल नेपाली कांग्रेसले भात्रृ, शुभेच्छुक र जनसम्पर्क समितिको नेतृत्व चयनको अन्तिम कसरत थालेको छ । लामो समयदेखि रिक्त रहेका भात्रृ संगठनहरुमा नेतृत्व चयन गर्ने र जनम्पर्क समितिका बिषयमा उठेका विवादलाई साम्य गर्नेगरी विहीबार केन्द्रीय समितिको बैठक बस्दैछ ।
नेपाली कांग्रेसले बुधवार केन्द्रीय समितिको बैठक बोलाएको थियो । तर वरिष्ठ नेता रामचन्द्र पौडेल अस्वस्थ भएका कारण विहीबार सारिएको थियो । आजको बैठकमा विशेषगरी नेपाल बिद्यार्थी संघको नेतृत्व चयन गर्ने गरी छलफल हुनेभएको छ । नैनसिंह महरले राजीनामा लिएपछि रिक्त रहेको नेपाल बिद्यार्थी संघलाई नयाँ नेतृत्व दिनेगरी कांग्रेसले छलफल थालेको छ ।
बुधवार वरिष्ठ नेता अस्वस्थ भएपनि पदाधिकारी बैठक भने बसेको थियो । बैठकले नेविसंघ र अध्यक्षदेखि महामन्त्रीसम्मको नाममा छलफल गरेको थियो । पार्टी सभापति शेरबहादुर देउवा समुहबाट पूर्वउपाध्यक्ष ऋषिकेश जंग शाह र शुभराम बस्नेत प्रवल दावेदार छन् भने वरिष्ठ नेता रामचन्द्र पौडेलले मनोजमणि आचार्यलाई अगाडी सारेका छन् । त्यसैगरी कांग्रेसभित्रको तेस्रो ध्रुव मानिने कृष्णप्रसाद सिटौलाले निवर्तमान महामन्त्री कुन्दनराज काफ्लेका पक्षमा वकालत गरिरहेका छन् ।
नेविसंघको अन्तरिमकालिन नेतृत्वमा शाह र बस्नेत मध्ये एक आउने सम्भावना रहेको छ । यी दुवै देउवाका अतिविश्वासिला बिद्यार्थी नेता हुन् । दुवै जना निकै क्रियाशिल भएका कारण देउवा नेतृत्व कसलाई दिनेमा अलफलमा परेका थिए । तर पछिल्लो समय उनी दुई मध्ये एकलाई चयन गर्ने पक्षमा उभिएका छन् ।
नेविसंघको अन्तरिमकालिन अध्यक्षका लागि सरोज थापा युवराज पाण्डे, दिपक भट्टराई रामप्रसाद अधिकारी, निलकण्ठ रिजाल आकाँक्षी छन् । तर शाह र बस्नेतमध्ये एकजनाले नेृतव्व पाउने लगभग निश्चित भइसकेको कांग्रेस स्रोतले बताएको छ ।
