प्रधानमन्त्रीले गरे सिंगापुरबाटै भिडियो कन्फेरन्सबाट मन्त्रीपरिषदको बैठक
उपचारका लागि सिंगापुरमा रहेका प्रधानमन्त्री केपी शर्मा ओली सोमबार भिडियो कन्फेरेन्सबाट मन्त्रीपरिषदको बैठकमा सामेल हुने भएका छन् । मन्त्रीपरिषदको बैठक सोमबार दिउँसो १२ बजे प्रधानमन्त्री कार्यालय सिंहदरवारमा बस्दैछ । ‘प्रधानमन्त्रीज्यू भिडियो कन्फेरेन्सबाट बैठकमा सहभागी हुनुहुनेछ’ संघिय मामिला तथा सामान्य प्रशासनमन्त्री लालबाबु पण्डितले भने ‘सिंहदरवारमा हामी सवै मन्त्रीहरु सहभागी हुने प्रधानमन्त्री सिंगापुरबाट भिडियो कन्फेरेन्स रहनेगरी बैठक बस्न लागेको छ ।’
प्रधानमन्त्री ओली देशमा नभएपनि मन्त्रीपरिषदको बैठक भने रोकिने छैन । ओलीले अस्पतालबाटै भिडियो कन्फेरेन्सको माध्यमले बैठकमा सहभागीता जनाउने भएका छन् । कार्यबहाक प्रधानमन्त्री इश्वर पोखरेलको अध्यक्षतामा बैठक बसेपनि प्रधानमन्त्री भने डिजिटलरुपमा सहभागी हुने भएका छन् । भिडियो कन्फेरेन्सका लागि प्रधानमन्त्री कार्यालयमा बिशेष कक्षका निर्माण गरिएको छ । देशका ठुला आयोजनाको रेखदेख गर्न बिशेष कक्ष निर्माण गरिएको थियो । कतिपय बेला प्रधानमन्त्री ओलीले यही भिडियो कन्फेरेन्सबाट प्रदेशका मुख्यमन्त्रीहरुसँग सम्वाद पनि गर्दै आएका थिए ।
आजको बैठकमा कार्यबहाक प्रधानमन्त्री पोखरेलले मन्त्रीपरिषदमा एजेण्डा राख्नेछन् । एजेण्डाको निर्णय ओलीले अस्पतालको बेडबाटै गर्ने गरी भिडियो कन्फेरेन्सको तयारी गरिएको हो । प्रधानमन्त्री ओलीको सिंगापुर नेशनलल युनिभर्सिटी हस्पीटलमा प्लाज्मा फेरेसिस प्रक्रिया गत शुक्रबारदेखि शुरु भएको छ । उपचारकै क्रममा प्रधानमन्त्री मन्त्रीपरिषदको बैठकमा सहभागी हुनेछन् ।
