ठूला भ्रष्टाचारीहरु सार्वजनिक हुने अख्तियार प्रमुखको दावी
लामो समय देखि भ्रष्ट्राचारका कारण बर्बाद हुँदै गइरहेको नेपालमा अहिले पनि न्युनीकरण हुने संकेत देखिएको छैन । यो बीचमा भ्रष्ट्राचार नियन्त्रणका लागि काम गर्दै आएको अख्तियार दुरुपयोग अनुसन्धान आयोग अहिले सक्रिय बन्न थालेको छ ।
आयोगका प्रमुख आयुक्त नवीनकुमार घिमिरेले केही समयपछि अहिलेसम्मकै सबैभन्दा ठूलो भ्रष्टाचारी सार्वजनिक हुने दावा गर्नुभएको छ । उहाँले अख्तियारले अहिले अकुत सम्पत्ति कमाउने १४० जनाको अनुसन्धान गरिरहेको र यो अनुसन्धानपछि अहिलेसम्मकै सबैभन्दा ठूला भ्रष्टाचारीहरु सार्वजनिक हुने बताउनुभयो ।
ट्रान्सपरेन्सी इन्टरनेसनल नेपालको २४ औँ स्थापना दिवसमा मंगलबार आयोजित ‘सुशासन र राजनीतिक सदाचार’ विषयक छलफल कार्यक्रममा उहाँले आयोगले अहिले विविध प्रकृतिका एक हजार पाँच सयवटा भ्रष्टाचार मुद्दाको अनुसन्धान गरिरहेको जानकारी दिनुभयो । यस भन्दा पहिले आयोगमाथि साना माछा समात्ने तर ठुला माछा छोड्ने गरेको आरोप लाग्दै आएको छ ।
