काठमाडौंमा समातिए विप्लवका तीन शक्तिशाली नेता
प्रतिबन्धित नेपाल कम्युनिस्ट पार्टी नेत्रविक्रम चन्द विप्लव समूहका तीन जना शक्तिशाली नेतालाई महानगरीय प्रहरी अपराध महाशाखाले काठमाडौंबाट पक्राउ गरेको छ ।
केन्द्रीय सदस्यसहित तीन जनालाई योजना बनाउने क्रममा नियन्त्रणमा लिइएको प्रहरी स्रोतले जनाएको छ । सोमबार केन्द्रीय सदस्य डम्बरबहादुर विक, वैकल्पिक केन्द्रीय सदस्य मकर गुरुङ र उमा गुरुङलाई महाशाखाबाट खटिएको टोलीले बत्तिसपुतलीबाट नियन्त्रणमा लिएको थियो ।
पक्राउ गरिएका मध्ये डम्बरबहादुरले पार्टी परित्याग गरेको बताइएको थियो । त्यसको स्वतन्त्र पुष्टि हुन सकेको छैन । यता महाशाखाले विप्लव समूहका मात्रै एक हजार जना नेता कार्यकताृलाई टार्गेटमा राखेको छ । प्रहरी स्रोतका अनुसार प्रत्येक महिनामा प्रगतिका काम भइरहेका छन् ।
जेठमा मात्र उपत्यकाको भक्तपुर र ललितपुरका कतिपय नेतालाई पक्राउ गरी उनीहरूको मोबाइल प्रहरीले जफत गरेको थियो । रणनीति र कार्यक्रमहरु कसरी चलाइन्छ भन्ने बारेमा महाशाखाले अध्ययन गरीरहेको बताइन्छ ।
