विप्लव समूहले फेरी चन्दा उठाउन थाल्यो, को को छन निशानामा
नेत्रविक्रम चन्द नेतृत्वको प्रतिबन्धित नेपाल कम्युनिष्ट पार्टीले विज्ञप्ति जारी गरेरै चन्दा मागेको छ । पाँच महिने आर्थिक अभियानको घोषणा गर्दै विप्लव समूहले चन्दाका लागि अपिल गरेको हो ।
पार्टीका प्रवक्ता खड्गबहादुर विश्वकर्मा प्रकाण्डले शनिबार विज्ञप्ति जारी गर्दै चन्दाका लागि आह्वान गरेका हुन् । प्रकाण्डले आर्थिक सहयोग अभियानमा पार्टीबाट कारबाहीमा परेका र भगौडाहरुसँग सचेत रहन अपिल गरेका छन । उनले अभियानलाई पार्टीले कारबाही गरेका र भगौडाहरूले दुरुपयोग गर्नसक्ने खतराप्रति सतर्क रहन सचेत गराएका हुन् ।
‘जनताको सहयोग र समर्थनबिना हाम्रो पार्टी क्रियाशील हुन सम्भव छैन । देशको राजनीतिक, आर्थिक, सांस्कृतिक संकटको समाधान क्रान्तिले मात्र सम्भव छ’, विज्ञप्तिमा भनिएको छ, ‘त्यसैका लागि असारदेखि कात्तिकसम्म पाँच महिना पार्टीले आर्थिक सहयोग अभियान सञ्चालन गरेको छ । यसलाई सदाझैँ सहयोग गरिदिनुहुन अनुरोध छ ।’ अभियानमा केन्द्रीय समिति, ब्युरो, जिल्ला र जवस तथा मोर्चाहरूको संयुक्त र एकीकृत सहभागिता रहने जनाइएको छ ।
२००७ सालदेखिका सशस्त्र संघर्ष, जनसंघर्ष र जनआन्दोलनका उपलब्धिहरूलाई अहिले कम्युनिष्ट आवरणमा हमला भइरहेको समूहको आरोप छ । जनताका राजनीतिक, आर्थिक र सांस्कृतिक अधिकारहरूलाई बन्दुकको बलमा दबाउन खोजेको पनि आरोप लगाइएको छ ।
‘राजनीतिक असहमति राख्ने निशस्त्र र राजनीतिक कार्यकर्तालाई शान्ति र विकासविरोधी आरोपमा हत्या गरेको छ । हत्या, बलात्कार र लुटपाट गर्नेलाई मन्त्रीका नाता–गोता र वली सरकारको गृह प्रशासनले संरक्षण गरिरहेको छ’, विज्ञप्तिमा भनिएको छ ।
पार्टीले अघि सारेको एकीकृत जनक्रान्तिको कार्यक्रमका निम्ति कुनै पनि जोखिम मोल्न र बलिदान गर्न आफूहरु तयार छ रहेको प्रकाण्डले विज्ञप्तिमार्फत जनाएका छन् । ‘जनक्रान्तिबिना देश र जनताका पक्षमा आमूल परिवर्तन सम्भव छैन’, विज्ञप्तिमा भनिएको छ । विप्लव समूहलाई सरकारले गएको फागुन २८ गते प्रतिबन्ध लगाएको थियो ।
हेर्नुहाेस् चन्दाका लागि आह्वान गरिएको विज्ञप्ति :
