ओसामा बिन लादेनका छोरा हम्जा मारिएको दाबी, ट्रम्पले भने– अहिल्यै केही भन्दिनँ
अल–कायदा प्रमुख ओसामा बिन लादेनका छोरा हम्जा मारिएको अमेरिकी सञ्चारमाध्यमले जनाएका छन् ।
अमेरिकी प्रशासनको सर्वाधिक खोजी सूचीमा राखिएका हम्जाले आफू अल–कायदाको नेता भएको बताउँदै आएका थिए ।
उनी मारिएको स्थान र मिति भने खुलाइएको छैन । यसबारे पेन्टागनका अधिकारी बोलेका छैनन् ।
अमेरिकी प्रसारण संस्था एनबीसी न्युजका अनुसार तीन अधिकारीले हम्जाको मृत्यु भएको पुष्टि गरेको छ ।
उनीहरुले थप विवरण दिन अस्वीकार गरेका छन् । राष्ट्रपति कार्यालयमा पत्रकारले सोधेको प्रश्नमा राष्ट्रपति डोनाल्ड ट्रम्पले एनबीसीको समाचार सही वा गलत भन्नेबारे बताउन अस्वीकार गरे । भने, ‘यसबारे अहिल्यै केही टिप्पणी गर्न चाहन्नँ ।’
सन् २०१९ फेब्रुअरीमा अमेरिकी विदेश मन्त्रालयले हम्जाको टाउकाको मूल्य १० लाख अमेरिकी डलर तोकेको थियो ।
त्यसअघि उनको मृत्यु भइसकेको अनुमान गरिएको छ । ओसामाका २० छोराछोरीमध्ये हम्जा १५औं सन्तान हुन् । ओसामाकी तेस्रो पत्नीबाट जन्मिएका हम्जा ३० वर्ष हाराहारीका थिए । अमेरिकी विदेश मन्त्रालयले ओसामाको उत्तराधिकारीका रुपमा हम्जाले अलकायदाको नेतृत्व गर्न थालेको जनाएको छ ।
‘जिहादी राजकुमार’का रुपमा लिइने हम्जाले बेलाबखत अडियो र भिडियो सन्देशमार्फत अमेरिका र उसका समर्थक मुलुकमाथि आक्रमण गर्न आह्वान गर्दै आएका थिए ।
खासगरी सन् २०११ मा पाकिस्तानमा अमेरिकी सेनाको कारबाहीमा बुवा ओसामाको हत्यामा संलग्नमाथि कारबाही गर्ने धम्की हम्जाले दिएको विदेश मन्त्रालयको दाबी छ ।
पाकिस्तानको अबोटाबादमा ओसामाको घरबाट बरामद गरिएका कागजातमा हम्जालाई अल–कायदाको उत्तराधिकारी बनाउन थालेको उल्लेख थियो ।
एक अर्को भिडियोमा हम्जाले अल–कायदाका वरिष्ठ व्यक्तिकी छोरीसँग विवाह गरेको देखिएको थियो । उनीहरु दुबै इरानमा बसेको विश्वास गरिएको छ ।
