कास्कीबाट रवीन्द्रको निर्वाचन क्षेत्रमा गौतमलाई उम्मेदवार बनाउँने पक्का
नेपाल कम्युनिस्ट पार्टीका ‘गतिशील’ नेता वामदेव गौतमसँग प्रधानमन्त्री केपी शर्मा ओलीको समझदारी बनेपछि गौतमले संसदमा प्रवेश पाउने सम्भावना बढेको छ । ओलीसँगको असमझदारीलाई यथावत् राख्दै प्रचण्डसँगको गठबन्धनबाट संसद्मा छिर्न यसअघि पटकपटक भएका उनको प्रयास असफल भएको थियो । दुई साताअघि केपीसँगको लामो संवादपश्चात् वामदेव गौतमलाई सङ्गठन विभागको प्रमुख बनाउन र संसद्मा प्रवेश गराउन ओली राजी भएका हुन् ।
वामदेव गौतम अब कसैलाई पदबाट राजीनामा गराएर सांसद बन्ने योजनामा नभएको बताइन्छ । रवीन्द्र अधिकारीको निधनपश्चात् कास्कीको रिक्त निर्वाचन क्षेत्रमा नै उनको उम्मेदवारी हुने भएको छ । रवीन्द्रपत्नीलाई ६ महिनापछि राष्ट्रिय सभा सदस्य बनाइने र सकेसम्म कुनै मन्त्रालयको जिम्मेवारीसमेत दिइने सर्तमा गौतम कास्कीबाट उम्मेदवार बन्न तयार भएका हुन् । आगामी मङ्सिरसम्ममा कास्कीमा उपनिर्वाचन गराइने र वामदेव गौतम त्यहाँ उम्मेदवार बन्नेचाहिँ अब निश्चितप्रायः छ । यसबीचमै केपीसँग कुनै असमझदारी पैदा भएमा भने अन्यथा हुन सक्ने सम्भावना भने यथावत् रहेको छ ।
