नेकपामा कसैलाई पदै पद, कसैलाई पुर्पुरोमा हात
नेकपा एकतामा गुटगत स्वार्थका कारण कुनै नेतालाई पदै पदको भारी भएको छ । कतिपय नेता भने भूमिकाविहीन बनेका छन् । शीर्ष नेताका विश्वास पात्रले तीनदेखि चार पदसम्म ओगटेका छन् । एकतामा कसैलाई पदै पद त कसैलाई पुर्पुरोमा हात भएको छ ।
प्रदेश ३ का आन्तरिक मामिलामन्त्री शालिकराम जम्कट्टेल अध्यक्ष पुष्पकमल दाहाल ‘प्रचण्ड’का विश्वासपात्र हुन् । उनी चार पद पाउने भाग्यशाली देखिएका छन् । उनीसँग एक होइन जिल्लादेखि केन्द्र र सरकारसम्म चार पद छन् । उनले नेकपाको धादिङ जिल्लामै दुई पद पाएका छन् । जिल्ला इन्चार्ज र सचिव दुवै पदको उनको भागमा परेको छ । त्यसैगरी उनी नेकपा केन्द्रीय सदस्य र प्रदेश ३ का आन्तरिक मामिलामन्त्री छन् ।
अर्का भाग्यमानी हुन् सञ्चार, सूचना तथा प्रविधिमन्त्री गोकुल बाँस्कोटा । उनी तत्कालीन नेकपा एमालेको नवौं महाधिवेशनमा केन्द्रीय सदस्य पदमा पराजित भएका थिए । तर, नेकपा अध्यक्ष तथा प्रधानमन्त्री केपी शर्मा ओलीको आशीर्वादमा उनले तीन पद हत्याएका छन् । केन्द्रीय सरकारको सञ्चारमन्त्री, नेकपा केन्द्रीय सदस्य र काभ्रे जिल्ला इन्चार्जसहित तीन पद उनले पाएका छन् ।
त्यस्तै, प्रधानमन्त्री ओलीका विश्वासपात्रमा भूमिव्यवस्थामन्त्री पद्मा अर्याल पनि पर्छिन् । उनले पनि तीन पद पाएकी छन् । मन्त्री, केन्द्रीय सदस्य र स्याङ्जा जिल्ला इन्चार्ज । संघ सरकारको भूमिव्यवस्थामन्त्री बनेकी अर्याललाई मन्त्रालय सम्हाल्न धौधौ छ । त्यसमाथि दुई पद थपिएका छन् ।
एकै व्यक्तिलाई चार पद दिँदा गुटगत स्वार्थ पूरा भए पनि सेवाप्रवाह हुन नसक्ने भन्दै नेकपाभित्र आलोचना सुरु भएको छ । एउटै पद सम्हाल्न नसकेर असफल भएका व्यक्तिलाई चार पद दिइएको छ । तीनदेखि चार पद पाउने व्यक्तिले समय व्यवस्थापन गर्न नसक्ने र पदप्रति न्याय पनि हुन नसक्ने नेता ठाकुर गैरेले बताए ।
त्यसैगरी कर्णाली प्रदेशका मुख्यमन्त्री महेन्द्रबहादुर शाहीलाई पनि तीन पद मिलेको छ । मुख्यमन्त्रीमै समय व्यवस्थापन गर्न नसकेका शाहीलाई पार्टीको केन्द्रीय सदस्य र कालिकोट जिल्लाको इन्चार्ज दिइएको छ ।
