सिटिजन्स बैंकबाट साढे २ किलो सुन गायव, सुन हराएको तीन बर्षसम्म काण्ड किन कगुपचुप
सिटिजन्स बैंकबाट चार वर्षअघि गायव भएको साढे दुई किलो सुन अझै फेला पर्न सकेको छैन । बैंकको न्युरोड शाखाबाट २०७२ भदौ १५ गते २ करोड २८ लाख ३८ हजार ४ सय १ रुपैयाँबराबरको सुन हराएको थियो । त्यो सुन सर्वसाधारणले धितो राखेका थिए ।
यो घटनामा बैंक प्रशासन तीन वर्षसम्म मौन बसेको थियो । त्यही बीचमा माथिल्ला तहका कर्मचारीले तल्ला तहकालाई कारबाही गर्न थाले । त्यसपछि मात्र घटना प्रहरीको केन्द्रीय अनुसन्धान ब्युरो (सीआईबी) मा पुगेको खुलेको छ ।
सुन कसरी हरायो ? त्यसको जानकारी बैंकका सानादेखि ठूला कर्मचारी सबैलाई थियो । तापनि, बैंकले न सुनको खोजी गर्यो न त प्रहरीमा उजुरी दियो । बैंकभित्र तस्करी गर्ने समूहको प्रभावमा सुन गायव भएको थियो । बैंकले २०७५ भदौ १० गते मात्र सीआईबीमा उजुरी दर्ता गरेको थियो ।
बैंकका तत्कालीन कानुन शाखा प्रमुख केदार अधिकारीले उजुरी दर्ता गराएका थिए । सात किलो ४ सय ९७ ग्राम सुन हिनामिना भएको उजुरीमा उल्लेख छ । तर, सीआईबीले दुई किलो ४ सय २३ ग्राम सुन हराएको निष्कर्ष निकाल्दै अदालतमा बैंकिङ कसुरसम्बन्धी मुद्दा चलाएको थियो ।
सिटिजन्स बैंकले अझै सुन प्रकरणलाई ढाकछोप गर्न खोजिरहेको छ । ‘हाम्रो बैंकमा यस्तो कुनै काण्ड भएको छैन । अदालतमा पनि मुद्दा छैन’ सिटिजन्स बैंकका मार्केटिङ प्रमुख अमित शाहले भने । बैंककै प्रवक्ता उमंग शर्माले भने साढे २ किलो सुन हराएर पनि मुद्दा अदालतमा चलिरहेको बताइन् । ‘मुद्दा अदालतमा छ । सुन जाँचकी आफंैले प्रहरीमा आत्मसमर्पण गरेकी छिन् ।’
