प्रचण्डका घरबेटीले देशभरको सडक अलपत्र पारेपछि संसदीय समितिले लगाउँने भयो डण्डा
नेकपा अध्यक्ष तथा पूर्व प्रधानमन्त्री प्रचण्डका घरबेटीले पाँच वर्षदेखि अलपत्र पारेको सडकमा संसदिय समितिले अनुगमन गर्ने भएको छ । प्रतिनिधी सभाको विकास तथा प्रविधि समितिले आइतबार प्रचण्डका घरबेटीले अलपत्र पारेको भक्तपुर–नगरकोट सडकको स्थलगत अनुगमन गर्न लागेको हो ।
भक्तपुरको कमलबिनायकस्थित भत्केपाटी–देखि नगरकोट जाने सडक विगत पाँच बर्षदेखि अलपत्र अवस्थामा छ । समिति सभापति कल्याणी खड्काको नेतृत्वमा एक दर्जन सांसद, भक्तपुरका सांसद महेश बस्नेत र प्रेम सुवाल, भक्तपुर नगरपालिकाका मेयर सुनिल प्रजापति, चाँगुनारायण नगरपालिकाका मेयर सोम मिश्र, आयोजनाका इञ्जिनियर तथा पत्रकारहरुसहितको टोलीले आइतबार सडक अनुगमन गर्न लागेको हो ।
प्रचण्डका घरबेटी सारदा प्रसाद अधिकारीको सैलुङ कन्स्ट्रक्सनले १६ किलोमिटर लामो सडक दुई बर्षमा सम्पन्न हुने गरि २०७१ साउन २ गते भ्याटसहित २८ करोड लागतमा ठेक्का लिएको थियो । कम्पनीले ठेक्का पाएको पाँच बर्षे अवधीमा तीन पटक म्याद थप र १३ प्रतिशत भेरिएसन लिईसकेको छ । तर काम भने जम्मा ६० प्रतिशत मात्रै सम्पन्न गरेको छ । पछिल्लो एक बर्षदेखि सडक आयोजनाले म्याद थपिदिएको छैन भने कम्पनीले निर्माणको काममा पनि चासो देखाईरहेको छैन् ।
राजधानीको सबै भन्दा नजिक रहेको रमणीय प्राकृतिक पर्यटन गन्तव्य नगरकोट जाने सडक घाम लाग्दा धुलो र पानी पर्दा हिलोको चपेटामा पर्दै आएको छ । चाँगुनारायण नगरपालिकाका मेयर सोम मिश्रले नगरकोटको पर्यटन व्यवसाय र सो क्षेत्रका नागरिकको भविष्यमाथी निर्माण व्यवसायीले खेलबाड गरेको आरोप लगाए । सडकको अवस्था १६ किलोमिटर लामो सडक निर्माण सम्बन्धी सम्झौता २०७१ असार २ गते भएको थियो । २०७३ असार ३ गते सडक निर्माण गरेर हस्तान्तरण गर्नुपर्ने सडकमा ३ पटक म्याद थप गरिसकिएको छ ।
२०७३ साउन ३ गते सम्पन्न हुनपर्ने सडकको भूकम्पका कारण ढिलाई भएकाले २० कात्तिक ०७३ सम्मका लागि एक सय २५ दिन म्याद थपिएको थियो । दोस्रोपटक तीन सय ८० दिन र तेस्रोपटक दुई सय २१ दिन म्याद थप गरिसकिएको छ । पछिल्लो पटक २०७५ जेठमा पुनः एक बर्ष म्याद थप्नुपर्ने भन्दै निर्माण व्यवसायीले माग गरेका थिए तर आयोजनाले यथोचित कारण नभएको भन्दै प्रक्रिया अघि बढाएको छैन् । हालसम्म निर्माण व्यवसायी कम्पनीले १४ करोड रुपैंयाँ भुक्तानी लिईसकेको छ भने १३ प्रतिशत भेरियसन अर्डर समेत पास भैसकेको छ ।
