चिनियाँ लगानीको ह्वासिन सिमेन्ट उद्योग बाढीले क्षतिग्रस्त
१५ अर्ब रुपैयाँ लगानीमा निर्माणाधीन ह्वासिन सिमेन्ट उद्योग बाढीले क्षतिग्रस्त बनाएको छ । चिनियाँ कम्पनी ह्वासिन सेन्ट्रल एसिया इन्भेष्टमेन्ट (हुवान) कम्पनी लिमिटेडको लगानीमा धादिङको बेनीघाट रोराङ गाउँपालिका–२ मा निर्माणाधीन उद्योगमा बाढी पसेको हो ।
उद्योगमा कार्यरत ५ जना मजदुरसमेत बाढीमा फसेका थिए । यद्यपि, अहिले सबैको उद्दार भइसकेको जिल्ला प्रहरी कार्यालय धादिङका प्रहरी उपरीक्षक राजकुमार वैदवारले जानकारी दिए । उनका अनुसार आइतबारबाट उद्योग क्षेत्रमा बाढी पस्न शुरु गरेको थियो । साँझसम्म डुबान भएपछि नजिकैको प्रहरी टोलीले उद्दार गरेको उनले जानकारी दिए ।
उद्योगले गतवर्ष १५ अर्ब रुपैयाँ प्रत्यक्ष वैदेशिक लगानी गर्न लगानी बोर्डबाट स्वीकृति पाएको थियो । उद्योगमा चिनिया कम्पनी हुवानको ८५ प्रतिशत र सुरज वैद्यको वैद्य समूहको १५ प्रतिशत लगानीमा ह्वासिन सिमेन्ट नारायणी प्रालिको निर्माण शुरु गरिएको थियो ।
गत फागुनमा सभामुख कृष्णबहादुर महराले शिलान्यास गरेको यस उद्योग भौतिक संरचना निर्माण एक वर्षमा सक्ने लक्ष्य लिइएको थियो । होङ्सीपछि मुलुककै ठूलो उद्योगको रुपमा स्थापना गर्ने लक्ष्यका साथ यो उद्योगको निर्माण शुरु गरिएको कम्पनीका प्रतिनिधि डिल्ली अधिकारी बताउँछन् ।
सिमेन्ट उद्योगले आफूलाई चाहिने कच्चा पदार्थ स्थानीय सामाग्रीको प्रयोग गरेर उत्पादन गर्ने गरी तयारी थालेको थियो । उद्योग निर्माणको काम एक वर्षमा सकिने र त्यसपछि दैनिक ६० हजार बोरा सिमेन्ट उत्पादन गर्ने लक्ष्य बताइएको थियो ।
क्षतिको विवरण आउन बाँकी
जिल्ला प्रहरी कार्यालयका अनुसार क्षतिको विवरण आइसकेको छैन । ‘कुनै मानवीय क्षति भने भएको छैन, फसेका मजदुरलाई पनि प्रहरीको टोलीले उद्दार गरिसकेको छ’ जिल्ला प्रहरी प्रमुख बैदवारले भने, ‘भौतिक संरचनाहरुमा भने क्षति पुर्याएको छ ।’ निर्माणाधीन आयोजनामा प्रयोग भइरहेको २ वटा गाडी बाढीले पल्टाएको छ । त्यसबाहेक निर्माणमा प्रयोग गरिने विभिन्न उपकरणहरु बगाएको छ ।
उद्योग निर्माणका लागि लगिएका भौतिक वस्तुहरु धेरै बगाएको हुनसक्ने भएपनि अहिले डुबान भइरहेका कारण यकीन तथ्यांक दिन नसकिने उनले बताए । त्यस क्षेत्रमा अहिले पनि पानी परिरहेको छ । कम्पनीका प्रतिनिधि डिल्ली अधिकारीका अनुसार अझै थप क्षतिको खतरा छ ।
