कोशी ब्यारेजका ५६ वटै ढोका खोलिए
अबिरल वर्षाका कारण पूर्वी पहाडी क्षेत्रमा आएको बाढीले सप्तकोशीमा पानीको बहाव इतिहासकै उच्च भएको छ । शनिबार राति ९ बजेको मापन अनुसार पानीको वहाव ३ लाख ७१ हजार ११० सय क्यूसेक पुगेको छ ।
सप्तकोसी पुल उच्च जोखिममा परेका कारण राती १० बजे कन्ट्रोल रुमले ५६ वटै ढोका खुल्ला गरेको सशस्त्र प्रहरी बल भण्टावारीका इन्स्पेक्टर सुरेन्द्र भण्डारीले जानाकारी दिएका छन् ।
वर्षा निरन्तर जारी रहेकाले सप्तकोशीमा पानीको बहाव थप बढ्न सक्ने भन्दै प्रशासनले तटीय क्षेत्रका बासिन्दालाई सतर्क अवस्थामा रहन अपिल गरेको छ ।
स्थानीय प्रशासनले तटीय क्षेत्रमा उच्च सावधानी अपनाउन आग्रह गर्दै सबै निकायलाई तयारी अवस्थामा राखेको छ ।
यता ४३ वटा मात्र ढोका खोल्दा समेत आफ्नो बिहार राज्य ढुब्ने खतरा रहेको भन्दै भारतले ब्यारेजका ढोका नखोल्न दबाब दिएको थियो ।
ढोका नखोले कोशी ब्यारेजको पुल नै भत्किने र पूर्व मधेस पूरै डुब्ने भय भएपनि नेपालले कोशीका सबै ढोका खोलिएको हो । कोशीका सबै ढोका खोल्नुपर्ने अवस्था अहिलेसम्म आएको थिएन ।
यसको असर नेपालसँग सीमा जोडिएका भारतका केही राज्यहरुमा उच्च देखिएको छ । विशेष गरेर भारतको बिहार राज्यमा यसको धेरै असर देखा परेको भारतीय सञ्चारमाध्यमहरुले जानकारी दिएका छन् ।
भारतको दक्षिणी राज्यहरुमा पानीको महासंकट छाइरहेको बेला बिहार लगायतका उत्तरी राज्यहरुमा वर्षाको जोडदार असर देखिएको छ ।
यी राज्यहरुमा नेपालको तुलनामा मानवीय क्षति कम भएपनि पुरै राज्य तलाउ बनेको बताइएको छ । पानीले घरहरु पुरै डुब्न लागेका दृष्यहरु त्यहाँका मिडियाले प्रकाशन गरिरहेका छन् ।
