प्रधानमन्त्री ओलीले मलाई हेपे : देउवा
प्रमुख प्रतिपक्षी दल नेपाली कांग्रेसका सभापति शेरबहादुर देउवाले प्रधानमन्त्री केपी शर्मा ओलीबाट आफू हेपिएको गुनासो गरेका छन् ।
बुधबार प्रतिनिधि सभा बैठकमा बोल्दै उनले सदनमा जहिले पनि ओलीले हेपेको बताउँदै भने,‘प्रतिपक्षी दलको नेता बोल्दा सदनमा प्रधानमन्त्री पनि हुनुपर्छ ।’
उनले नेपालमा पहिलादेखि चल्दै आएको चलनलाई ओलीले तोड्ने काम गरेको आरोप लगाए । देउवाले मंगलबारको बैठकमा आफूले बोल्न पहिले समय मागेको बताए ।
मंगलबार आफूले पहिला सदनमा समय मागेको बताउँदै उनले प्रधानमन्त्रीले पनि मागेको प्रसङ्ग जोड्दै भने,‘मेरो कुरा सुनेको भए जवाफ दिन पाउनु हुन्थ्यो ।’ उनले सदन प्रतिपक्षीको हुने पनि बताए ।
प्रधानमन्त्रीभन्दा पहिला देउवा बोल्न पाउनु पर्छ भन्दै कांग्रेसले मंगलबारको प्रतिनिधि सभा बैठक अवरूद्ध गरेको थियो ।
उनले प्रधानमन्त्रीको बेलायत भ्रमण असफल भएको पनि टिप्पणी गरेका थिए ।
