अडान होस् त ईश्वर पोखरेलको जस्तो
नेपाल कम्युनिष्ट पार्टी (नेकपा) भित्र एक व्यक्ति एक पदको चर्चा व्यापक भइरहेका बेलामा सचिवालय सदस्य ईश्वर पोखरेल भने चट्टान झैं खडा भएका छन् ।
केपी शर्मा ओली प्रधानमन्त्रीसहित पार्टीको अध्यक्ष पनि हुने तर अर्का अध्यक्ष पुष्पकमल दाहाल प्रचण्डले सहमतिका बुँदा केलाउँदै हिँडेपछि उप्रधानमन्त्रीसमेत रहेका ईश्वर पोखरेलले अडान राख्दै प्रधानमन्त्री र पार्टी अध्यक्ष एउटै भनेका छन् ।
अर्थात् पाँच वर्षसम्म ओली नै प्रधानमन्त्री र ओली नै पार्टी अध्यक्ष । तत्कालीन नेकपा एमालेका नेताहरु भड्किइरहेका बेलामा ईश्वर पोखरेल मात्र चट्टान बनेर खडा भएका छन् । प्रचण्डले आलोपालो प्रधानमन्त्री हुने भन्ने विषय उठाएपछि पोखरेलको धैर्य टुटेको हो । उनले ओलीको एक्लै कबच बन्ने प्रयास गरेका छन् ।
पार्टीको नीतिबारे पनि पोखरेल अडिक
पार्टीको नीति केबल सत्ता र कुर्सी बन्दै गइरहेको सन्दर्भमा सचिवालय सदस्य पोखरेलले जनताको बहुदलीय जनवाद नै पार्टीको नीति भएको बताएका छन् । प्रचण्डले जब जब ट्रयाक बाहिर जाने प्रयत्न गर्छन् तबत ब पोखरेलले उनलाई सम्झाउने प्रयत्न गरिरहेका हुन्छन् ।
ओलीका भरोसा लायक अरु पनि नेताहरु होलान् । तर तिनीहरु बोल्दैनन् । उनीहरु विभिन्न स्वार्थमा डुलिरहँदा पोखरेलले भने आफ्नो अडान र ओलीप्रतिको भरोसालाई कायमै राखिरहेका हुन्छन् ।
पोखरेलले राखेको मदन भण्डारी प्रतिपादित जनताको बहुदलीय जनवादलाई ओलीले पनि स्वीकार गर्दै गत जेठको पहिलो साताभर त्यही नीतिलाई अगाडि सारिरहे ।
प्रचण्डले भने समय निकै अगाडि बढेको भन्दै पुरानो नीतिमा फर्कन नसकिने बताउँदै आएका छन् । यो विषयमा महाधिवेशनले टुंगो लगाउने भने पनि महाधिवशेन अगाडि नै यो विषयले ठाउँ पाएको हो ।
खासमा पोखरेल प्रचण्डप्रति पार्टी एकतादेखि नै शंकाको दृष्टिले हेर्छन् । जनता सामु गएर एकथरि कुरा गर्ने अनि सचिवालय बैठकमा त्यसो भनेकै हैन भन्ने नीति प्रचण्डको छ । यसप्रति उनी सशंकित छन् ।
एमालेकै नेताहरु ओलीसंग सन्तुष्ट छैनन् । उनीहरु अवसर खोजिरहेका छन् । तर ईश्वर पोखरेल यतिबेला व्यवहारिक दृष्टिकोणले नै अगाडि बढेका छन् ।
हुनत ईश्वरको ठूलो गुट छैन । उनले त्यसलाई फराकिलो पनि बनाउँदैनन् । उनी आफू गुटमा भन्दा एकतामा विश्वास गर्ने भन्दै आएका छन् । जो अडिक हुन्छ उसलाई सानातिना आरोह अवरोहले रोक्न सक्दैन ।
त्यसैले त पोखरेलले पार्टीभित्र सहमति र समझदारीको सीमाको दायरा हुने भन्दै त्यही दायराभित्र बस्न सबैलाई आग्रह गरेका छन् । अडान होस् त ईश्वर पोखरलको जस्तो ।
