विप्लव पनि एकदिन नेकपामै आउँछन्- प्रचण्ड
नेपाल कम्युनिष्ट पार्टी (नेकपा) अध्यक्ष पुष्पकमल दाहाल प्रचण्डले अन्तत नेत्रविक्रम चन्द ‘विप्लव’ पनि नेकपामै मिसिन आइपुग्ने बताएका छन् ।
विप्लव समूहले लिएको बाटोबाट गन्तव्यमा नपुगिने उनको दाबी छ । चन्द समूहका पोलिटब्युरो सदस्य पदम राईलाई आइतबार नेकपा प्रवेश गराउँदै अध्यक्ष प्रचण्डले हिंसाले गन्तब्यमा नपुगिने बताए । ‘एक दिन विप्लव पनि यही ठाउँमा आएर जोडिनुपर्छ ।’ उनले भने, ‘अहिले जुन बाटो हिँडिएको छ, यो गन्तव्यमा पुग्ने बाटो होइन । यसले राष्ट्र र जनतालाई क्षति मात्र गर्छ ।’
अध्यक्ष प्रचण्डले अरु व्यक्ति र पार्टीलाई पनि पूर्वाग्रह नराखी नेकपामा मिसिन आग्रह गरे । अहिलेको हिंसात्मक बाटो गलत रहेको उल्लेख गर्दै उनले देशले एउटै ठूलो कम्युनिष्ट पार्टी खोजेको बताए । राईको पार्टी प्रवेशले आफू र गृहमन्त्री रामबहादुर थापा (बादल) लाई बिहान रिसाएर हिँडेको छोराछोरी साँझ घर फर्किँदा जस्तै खुसी मिलेको प्रचण्डले सुनाए । उनले भने, ‘असाध्यै खुसी, रिसाएर घर छोडेर गए पनि के खायो होला के गर्यो होला भनेर दिनभर चिन्ता हुन्छ ।’
राई चन्द समूहमा सरकारसँग वार्ता गर्नुपर्छ भन्ने लाइनमा थिए । यही कारण उनलाई चन्द समूहले हालै पार्टीबाट निलम्बित गरेको थियो ।
