धुर्मुस-सन्तुलीले रंगशाला निर्माणको काम रोके, बार भत्काउने कँडेल पक्राउ
चितवनको भरतपुरमा निर्माणाधीन गौतम बु्द्ध अन्तर्राष्ट्रिय क्रिकेट रंगशालाको निर्माण कार्य रोकिएको छ । धुमुस सन्तुली फाउन्डेशनले सुरक्षाको कारण देखाउँदै रंगशाला निर्माणको काम रोकेको जानकारी दिएका छन् ।
बुधवार नेकपाका स्थानीय नेता तथा गृहमन्त्री रामबहादुर थापा बादलका विश्वास पात्र प्रकाश कँडेलको योजना रंगशालाको बार भत्काइएको थियो । जस्ता र तार लगाएको बार भत्काउँदै धुर्मुस सन्तुली फाउन्डेशनका कर्मचारीलाई धम्कि समेत दिएको फाउन्डेशनका अध्यक्ष सीताराम कट्टेल धुर्मुसले बताएका छन् । स्थानीयको अवरोध र धम्कीपछि उनले रंगशालाको काम रोकेको बताए ।
रंगशाला निर्माणस्थलमा लगाइएको झण्डै एक किलोमिटर बार कँडेलसहितका केही स्थानीयले भत्काएका थिए । बार भत्काएपछि रुदै धुमुर्सले आफ्ना कर्मचारीमाथी धम्कि दिएको बताएका थिए । कँडेलसहितका स्थानीयले त्यहाँ भएका रुखहरू पनि ढालेका छन् ।
रंगशाला निर्माणको पश्चिमतर्फ जमिन सडक निर्माणका लागि फाउण्डेसन छाड्नुपर्ने माग उनीहरुले राखेका छन् । कृषि तथा वनविज्ञान विश्वविद्यालय रामपुर चितवनले भोगचलन गर्दै आएको जग्गाबाट सडक बनाउनुपर्ने माग उनीहरुको छ ।
कँडेलसहित १६ पक्राउ
रंगशालको बार भत्काएको आरोप लागेका कँडेललाई प्रहरीले पक्राउ गरेको छ । गएराति कँडेललाई पक्राउ गरेको चितवनका प्रहरी प्रमुख दानबहादुर मल्लले बताए । कँडेलसँगै घटनामा संलग्न १६ जनालाई पनि प्रहरीले पक्राउ गरेको छ । कँडेलसहित १६ जनालाई सार्वजनिक सम्पतिमा नोक्सानी पुर्याएको तथा धम्क्याएको अभियोगमा मुद्दा चलाउन सकिने एसपी मल्लले बताए ।
