सरकारको अनुमतिबिनै अमेरिकी राजदूतले सुरु गरे ‘गफगाफ’
सरकारको असहमति र विवादका बाबजुद नेपालका लागि अमेरिकी राजदुत र्यान्डी बेरीले ‘अमेरिकी राजदूतसँग गफगाफ’ कार्यक्रम सुरु गरेका छन् ।
बेरीले गत सोमबार सामाजिक सञ्जालमा जोडिएका नेपाली नागरिकसँग कुराकानी गर्ने भन्दै ‘राजदूतसँग गफगाफ’कार्यक्रम सञ्चालन गर्ने घोषणा गरेका थिए । पूर्वघोषणा अनुसार बेरीले आज सामाजिक सञ्जालमा कार्यक्रमको पहिलो शृंखलाको भिडियो प्रसारित गरेका छन् ।
कार्यक्रमको पहिलो अंकमा अमेरिकामा पढ्न जान चाहने विद्यार्थीसम्बन्धी नेपाली विद्यार्थी प्राचीको प्रश्नको जवाफ दिएका छन् ।
दूताबासले सार्वजनिक गरेको भिडियोमा प्राचीले अमेरिका पढ्न जाने सोच बनाएका विद्यार्थीहरुलाई के सल्लाह दिनुहुन्छ भनेर प्रश्न गरेकी छन् । जवाफमा अमेरिकी राजदूत बेरीले यसबारे जानकारी दूताबासका शिक्षासम्बन्धी सल्लाहकारलाई सुझाव दिएका छन् ।
कार्यक्रम हेर्दा राजदूतले सिधै अन्तर्क्रिया गर्ने नभई प्रश्न लिएर आउने र राजदूतले जवाफ दिने देखिन्छ । अमेरिकी दूताबासले केही समय अघि ‘अमेरिकी राजदूतसँग गफगाफ’ कार्यक्रम सुरु गर्ने बताए पनि यसको स्वरुपबारे केही बताएको थिएन ।
यसरी खुल्मखुल्ला गरिने अन्तरक्रिया गैरकूटनीतिक हुने र यसले नेपालको आन्तरिक विषयमा टिकाटिप्पणी गर्ने तहमा राजदूतलाई स्थान दिने भन्दै त्यसको नागरिक तहमा विरोध भइरहेको छ।
सत्तारुढ नेपाल कम्युनिस्ट पार्टीका नेताहरु माधवकुमार नेपाल र भीम रावलले राजदूतको यस्तो काम गैरकुटनीतिक हुने भन्दै आलोचना गरेका थिए।
