विप्लव रुकुमपूर्व जिल्ला ईन्चार्ज नकाल पक्राउ
प्रतिबन्धित नेत्रविक्रम चन्द नेतृत्वको नेकपाका रुकुम पूर्व जिल्ला ईन्चार्ज कर्णबहादुर नकाल ‘शिशिर’ पक्राउ परेका छन् । उनलाई रुकुम पश्चिम सानीभेरी गाउँपालिका–३ गरायला क्षेत्रबाट पक्राउ गरिएको प्रहरीले जनाएको छ । उनको घर गरायलामै पर्छ ।
नकाल माओवादी जनयुद्धमा ब्रिग्रेड सहायक कमाण्डरसमेत भएका थिए। उनलाई हिरासत लिएर अनुसन्धान भइरहेको जिल्ला प्रहरी कार्यालय रुकुम पश्चिमले जनाएको छ।
सरकारले प्रतिबन्धित लगाएयता रुकुम प्रहरीले विप्लव समुहका ४ जना कार्यकर्ता पक्राउ गरेको छ । केहिदिन अघि विप्लव समुहका युवा संगठनका जिल्ला अध्यक्ष डिल्लीराज शर्मालाई पक्राउ गर्न प्रहीले हवाई फायर नै गरेको थियो ।
शर्मालाई चौरजहारी नगरपालिका–५ सल्लाबोटमा ‘हवाई फायर’ गरेर प्रहरीले नियन्त्रणमा लिएको थियो । पक्राउ गर्ने क्रममा शर्माको टाउको र प्रहरीलाई सामान्य चोटपटक थियो । तत्कालीन माओवादीले चलाएको जनयुद्धका बेला रुकुम बलियो आधार इलाका थियो ।
