नेकपामा पौडेललाई युवा, तामाङलाई विद्यार्थी नेतृत्व
नेपाल कम्युनिस्ट पार्टीको एकीकरण टुंगो लगाउनका लागि पेचिलो बनेको जनवर्गीय संगठनहरू मध्ये युवा र विद्यार्थीका लागि लविङ जारी छ । दुई अध्यक्ष प्रधानमन्त्री केपी शर्मा ओली र पुष्पकमल दाहाल प्रचण्डबीच विभिन्न पक्षको डेलिगेशन पुगिरहेको छ । अहिले अध्यक्षद्वयलाई बाँडफाँटका लागि सजिलो बनाउन दुई संगठनको सहज प्रस्ताव गरिएको छ ।
ओली नजिक रहेका युवा संघ नेपालका अध्यक्ष रमेश पौडेललाई एकीकृत युवाको अध्यक्ष र वाइसीएलका दिपशिखालाई सह–अध्यक्ष तथा अखिल क्रान्तिकारीका अध्यक्ष रञ्जित तामाङलाई अध्यक्ष र नवीना लामालाई सह–अध्यक्ष प्रस्ताव गरिएको छ ।
लामाले उक्त पद नलिए रश्मी आचार्यलाई सह–अध्यक्ष बनाउन सकिने हिसाबले लविङ सुरु भएको छ । तर, युवा र विद्यार्थी मोर्चा पूर्वमाओवादी खेमाले नै सम्हाल्नुपर्ने भन्दै प्रचण्डलाई दबाब पुगेको छ । यद्यपि, विद्यार्थीको नेतृत्व पाए युवा दस्ताको नेतृत्व पूर्वएमालेलाई छाड्न प्रचण्ड सहमत छन् ।
‘हामीले विद्यार्थीको नेतृत्व पाएको खण्डमा युवाको दाबी गर्ने छैनौं । अध्यक्षको त्यस्तो संकेत पाएका छौं’, स्रोतले भन्यो,‘त्यसो हुँदा सहज ढंगले पार्टी एकीकरणको काम सकिन्छ । आठ महिनाभित्र महाधिवेशन गर्ने भनिएकै छ ।’
