गृहमन्त्रीको जन्मोत्सवमा दश किलोको केक
प्रधानमन्त्री केपी ओलीले मन्त्री र उच्च कर्मचारीहरूलाई मितव्ययी बन्न बेलाबेला निर्देशन दिने गरेका छन् । ओलीले तडकभडक पनि नगर्न निर्देशन गरेका छन् ।
यसैक्रममा गृहमन्त्री रामबहादुर थापा ‘बादल’ले सुरक्षा प्रमुखहरूलाई साथमा राखेर आफ्नो जन्मोत्सव भव्य रुपमा मनाएका छन् । गृहमन्त्री थापाले बिहीबार राति पुल्चोकस्थित सरकारी क्वाटरमा आफ्नो ५४औँ जन्मोत्सव मनाएका हुन् । जन्मोत्सवका क्रममा गृहमन्त्री थापाले महँगो केक काटेर मनाएका छन् । थापाको जन्मोत्सवमा दुई वटा केक काटिएको उच्च स्रोतले जनाएको छ ।
गृहमन्त्री थापाको जन्मोत्सव मनाउने क्रममा तयारी पारिएको भिडियो सामाजिक सञ्जामाल भाइरल बनेको छ । दुई वटा केकको मूल्यका बारेमा केही भनिएको छैन । तर, दुई वटा केकको तौल कम्तीमा पनि दश किलोको हुन सक्ने प्रत्यक्षदर्शीको भनाइ छ ।
गृहमन्त्री थापाको जन्मोत्सव मनाउन नेपाल प्रहरीका महानिरीक्षक सर्वेन्द्र खनाल, गुप्तचर विभाग (राष्ट्रिय अनुसन्धान विभाग)का प्रमुख (आइजीपी) गणेश अधिकारीलगायतको उपस्थिति रहेको थियो ।
गुप्तचर विभाग प्रधानमन्त्री कार्यालयमा गाभिएको छ । गुप्तचर प्रमुख अधिकारी भने प्रधानमन्त्री ओलीको आँखा छलेर गृहमन्त्री थापाको जन्मोत्सव मनाउन सुटुक्क पुल्चोक पुगेपछि खैलाबैला भएको छ ।
