९९ वर्षीया महिलाको मृत्युपछि खुल्यो अनौठो रहस्य, शरीरका सबै अंग उल्टो
अमेरिकामा ५ सन्तानकी एक महिलाको हालै ९९ वर्षको उमेरमा मृत्यु भयो । ती महिलाले आफ्नो शरीर दान गरेकी थिइन् र उनको मृत्युपछि उनको शव पोर्टल्याण्डको ओरेगन हेल्थ एण्ड साइन्स युनिभर्सिटीलाई दान गरियो ।
जब विश्वविद्यालयका चिकित्सा शास्त्रका विद्यार्थीहरुले प्रयोगशालामा उक्त शवलाई चिरेर त्यसका भित्री अंगहरु अध्ययन गर्न थाले, तब सबै तीनछक परे ।
रोज मेरी नामकी ती मृतक महिलाको शवको चिरेर हेर्दा पत्ता लाग्यो कि उनको शरीरका भित्री अंगहरु असामान्य ठाउँमा छरिएका थिए ।
मानिसका भित्री अंग जुन ठाउँमा हुन्छन् उनका अंगहरु ती ठाउँमा थिएनन् ।
त्यस्तो खालको शारीरिक बनाटका साथ ती महिला ९९ वर्षसम्म कसरी बाँचिन् भनेर सबैजना तीनछक परेका छन् ।
उनका अधिकांश भित्री अंगहरु गलत ठाउँमा थिए । केही आकार असामान्य रुपमा ठूलो थियो । उनी लेभोकार्डिया तथा साइटस इनभर्सस नामको असामान्य अवस्थामा रहेको पाइयो ।
जसमा अधिकांश महत्वपूर्ण अंगहरु उल्टा हुन्छन् । उनको शरीरका अंगहरु देख्दा लाग्दछ कि शरीर भित्र ऐना राखिएको छ र अंगहरु उल्टा देखिएका छन् ।
विज्ञहरुका अनुसार हरेक ५ करोड मानिसमा एकजनामा यस्तो दुर्लभ समस्या हुन सक्दछ ।
शरीरभित्रका सबै अंग उल्टा हुँदा पनि रोजलाई जीवित छँदा कुनै समस्या नभएको उनका परिवारका सदस्यहरुको भनाइ छ ।
अर्को अनौठो कुरा त के भने रोजको मुटुको एउटा ठूलो नसासमेत सामान्य अवस्थामा थिएन । त्यो नसा दायाँ भागमा हुनुपर्नेमा बायाँ भागमा थियो । मुटुको दायाँ एट्रियम सामान्यभन्दा दोब्बर ठूलो थियो ।
दायाँ फोक्सोमा तीनवटा भाग हुनुपर्नेमा केवल दुईवटा भाग मात्र थिए । उनको अमासय पनि बायाँतर्फ हुनुपर्नेमा दायाँतर्फ थियो ।
पाचनतन्त्र पनि उल्टो थियो । चिकित्सा विज्ञानमा यो चमत्कारभन्दा कम होइन ।
शरीरको प्रणाली यतिधेरै जटिल हुनुका बाबजुद पनि रोज मेरीलाई कुनै समस्या भएन । उनलाई केवल बाथको समस्या मात्र थियो ।
