अमेरिकामा प्रचण्डले थाले कुटनीतिक भेटघाट, पूर्वराजदूतले भने-उहाँ गतिशील नेता हो
पारिवारिक उपचारका लागि अमेरिका पुगेका नेकपा अध्यक्ष पुष्पकमल दाहाल प्रचण्डले कुटनीतिक भेटघाट शुरु गरेका छन् । पत्नी सीता दाहालको उपचार गर्न अमेरिका पुगेका दाहालले आफ्नो पहिलो कुटनीतिक भेटघाट पूर्वराजदूतबाट गरेका छन् । भेटपछि नेपालका लागि पूर्व अमेरिकी राजदूत स्कट डेलिसीले प्रचण्ड गतिशील नेता भएको टिप्पणी गरेका छन् ।
प्रचण्डसँग भेटेपछि पूर्वराजदूत डेलिसीले ट्वीट गर्दै नेपालमा रहँदा प्रचण्डसँगको सहकार्य स्मरणीय भएको उल्लेख गरेका छन् । उनले प्रचण्डकै कारण नेपालको शान्ति प्रक्रिया यो अबस्थामा आएको बताउँदै उनी गतिशील नेता भएको बताए । ‘मेरो उहाँसँग केही असहमति र विवाद भए तर कहिल्यै शत्रुतापूर्ण सम्बन्ध रहेन’ उनले भनेका छन् ‘पूराना कुरामा अल्झिनुभन्दा समृद्ध नेपालका लागि अघि बढ्नु राम्रो हुन्छ ।’
‘प्रचण्ड नेपाल कम्युनिस्ट पार्टीका एक जना अध्यक्ष हुन्। म राजदूत हुँदा उनी माओवादीका नेता थिए। उनीसँग मिलेर मैले नाजिकबाट शान्ति प्रक्रियाका लागि काम गरेको थिएँ। हामी बारम्बार भेट गर्थ्यौं, हाम्रा भेटहरु गतिशील प्रकृतिका हुन्थे, कहिलेकाहीं विवादहरु हुन्थे। तर, शत्रुतापूर्ण कहिले भएन। हामीले मिलेर शान्तिको बाटो खोज्यौं, अनि आज ७ वर्षपछि अमेरिकाका लागि नेपाली राजदूत अर्जुन कार्कीको चाँजोपाजोमा कफी भेटघाट हुन सक्यो।’
