विप्लव कार्यकर्ताको हिरासत मै अनसन
सरकारले विप्लव समूहमाथि प्रतिबन्ध घोषणा गरेर कडाइ गरिरहेका बेला प्यूठानमा यो समूहका एक कार्यकर्ता आमरण अनसन बसेका छन् ।
कारागारले ‘आस्थाका बन्दी’को व्यवहार नगरेको भन्दै विप्लव कार्यकर्ता पदम पोखरेल अनसन बसेका हुन् ।
पोखरेल विप्लव नेतृत्वको नेकपाका विद्यार्थी नेता हुन् । उनलाई केही दिनअघि प्रहरीले पक्रेको थियो ।
यद्यपि, उनले पार्टीका कुनै पनि गतिविधिमा संलग्न नहुँदा-नहुँदै पनि आफूलाई नियन्त्रणमा लिएको गुनासो गरेका छन् । ‘आस्थाको बन्दी भए पनि प्रहरीले अपराधीलाई जस्तो व्यवहार गरेकाले ३६ घण्टादेखि अनसनमा छु’, उनले अनलाइनखबरसँग भने ।
हिरासतका बन्दीलाई हुनुपर्ने न्यूनतम व्यवहारसमेत नभएको उनको गुनासो छ । तर, प्यूठान प्रहरी प्रमुख डीएसपी निर्मल बुढाथोकीले भने आरोप अस्वीकार गरे । हिरासतका अन्य कैदी सरह नै उनीहरुलाई सेवा-सुविधा दिएको बुढाथोकीको भनाइ छ ।
नेपाली सेनाबाट सेवानिवृत्त स्याङ्जा स्थायी घर भई हाल प्यूठानको जस्पुरमा होटल व्यवसाय गर्दै आएका नवीन डुम्रेलाई पनि प्रहरीले विप्लव समूहको गतिविधिमा संलग्नको आरोपमा नियन्त्रणमा लिएको छ ।
