नरेन्द्र मोदी प्रधानमन्त्री कि चौकीदार ?
भारतीय प्रधानमन्त्री नरेन्द्र मोदीले आफ्नो ट्वीटरको नाममा चौकीदार जोडेका छन् । अब ट्वीटरमा उनलाई ‘चौकीदार नरेन्द्र मोदी’का रुपमा देख्न सकिने छ ।
उनको यो कदमलाई भाजपाका वरिष्ठ नेताहरुले समर्थन गरेका छन् । नामको अगाडी चौकीदार थपेपनि उनको वायोमा भने भारतीय प्रधानमन्त्री भनेरै उल्लेख छ ।
उनले मार्च ३१ देखि ‘म पनि चौकीदार’ नाममा चुनावी अभियान र टेलिभिजन कार्यक्रमसमेत सञ्चालन गर्दैछन् । आगामी अप्रिल र मेमा हुने लोकसभा निर्वाचनलाई लक्षित गरि उनले यो अभियान चलाउन लागेका हुन् ।
यस्तै, भाजपा अध्यक्ष अमित शाहले पनि आफ्नो नाममा चौकिदार जोडेर ‘चौकीदार अमित शाह’ बनाएका छन् । मोदी क्याविनेटका सबै मन्त्री तथा अन्य भाजपाका नेताहरुले पनि आफ्नो ट्वीटर नामको अगाडि चौकीदार थपेका छन् ।
आइतबार बिहानसम्म भाजपा अध्यक्ष अमित शाह, रेल मन्त्री पीयूष गोयल, स्वास्थ मन्त्री जेपी नड्डा र कयैन अन्य सत्तारुढ नेताहरुले आफ्नो नाम अघि चौकिदार राखेका छन् ।
नाम बदलेका मन्त्रीहरुले ट्वीट गरेर आफ्नो लक्ष्यबारेमा जानकारी दिएका छन् । उनीहरुले ‘म पनि चौकीदार’ र ‘फेरी पनि चौकीदार’ ह्यासट्याग जोडेर पोस्ट गरिरहेका छन् ।
मोदीको चौकीदार अभियानका विषयमा केहीदिनअघि विपक्षी दलकी एकजना सांसदले दिएको अभिव्यक्ति विवादमा परेको थियो । उनले ‘चौकीदार नेपालबाट जतिपनि ल्याउन सकिन्छ, हामीलाई चौकीदार होइन प्रधानमन्त्री चाहिन्छ’ भन्ने आशको ट्विट गरेकी थिइन् ।
