देशको सुरक्षामा कुनै कमि हुँदैन, अराजक गतिविधि भए सरकार चुप लागेर बस्दैन : मन्त्री पोखरेल
उपप्रधानमन्त्री तथा रक्षा मन्त्री इश्वर पोखरेलले देशको शान्ति सुरक्षा, अमनचयनलाई कुनै कमि हुन नदिने बताउँदै देशमा अराजक गतिविधि भए सरकार चुप लागेर नबस्ने चेतावनी दिनुभएको छ ।
काठमाडौँमा आयोजित राष्ट्रिय सुरक्षा परिषद्को १८ औं वार्षिकोत्सवका कार्यक्रममा बोल्दै मन्त्री पोखरेलले देशमा शान्ति, अमनचयन तथा राष्ट्रिय अखण्डतालाई मजबुद बनाउन सही र वास्तविक विष्लेषण गर्दै दिर्घकालिन लक्ष्यका साथ अघि बढ्नुपर्ने बताउनुभएको छ ।
मन्त्री पोखरेलले राष्ट्रिय सुरक्षालाई कायम राख्न र शान्ति अमनचयन स्थापीत गर्न राष्ट्रिय मूल्य र मानयताहरुलाई विशेष ध्यान दिनुपर्नेमा जोड दिनुभएको छ । उहाँले राष्ट्रिय हित नै अहिलेको सर्वपरी भएकाले त्यसलाई आत्मसात् गर्दै साझा धारणाहरु बनाउनुपर्ने बताउनुभयो । उहाँले चुनौति र खतराहरुका वारेमा वस्तुपरक भई निष्कर्षमा पुग्नुपर्ने बताउनुभयो ।
मन्त्री पोखरेलले सुरक्षा नीति बनाउँदा सवैका साझा धारणाका साथ उपयुक्त नीति बनाई कार्यान्वयवनमा लैजानुपर्नेमा जोड दिनुभयो । राष्ट्रिय सुरक्षा नीति २०७३ लाई परिमार्जन गरी राष्ट्रिय सुरक्षा नीति २०७५ जारी गर्ने प्रकृयामा रहेको समेत जानकारी गराउनुभयो ।
सुरक्षा सम्बन्धी मुल नीतिका आधारमा अघि बढ्ने बताउँदै मन्त्री पोखरेलले मुलुकको सुरक्षा सम्बन्धी विशेष नीतिहरु तयार पारिने समेत जनाकारी गराउनुभयो । उहाँले राष्ट्रिय सुरक्षा परिषद्लाई गति प्रदान गर्न तथा भूमिकालाई थप प्रभावकारी बनाउन समितिमा छलफलका क्रममा रहेको समेत जानकारी गराउनुभयो ।
राष्ट्रिय सुरक्षा परिषद्को नीतिले नेपाल सरकारको सुरक्षा सम्यन्त्र, मूल नीतिको कार्यान्वयनमा सुनिश्चितता, समन्वय, अनुगमन तथा मूल्याङ्कन प्रमुख जिम्मेवार निकायको रुपमा अघि बढाउनु पर्नेमा जोड दिनुभयो ।
