इथियोपियन विमान दुर्घटनामा गोरखाकी एकता अधिकारीको मृत्यु
आइतबार भएको इथियोपियन विमान दुर्घटनामा परि एक नेपालीको पनि मृत्यु भएको छ । मुत्यु हुनेमा गोरखाकी एकता अधिकारी रहेकी छिन् । उनी इथियोपियाको अदिस अबाबास्थित विश्व खाद्य कार्यक्रम कार्यालयमा सप्लाई चेन अफिसरका रुपमा कार्यरत रहेको बताइएको छ । अधिकारी आइतबार डब्लूएफपीकै एक कार्यक्रममा सहभागी हुन विमानमार्फत नैरोबी जादै थिइन् ।
एकता २ वर्ष अघिसम्म नेपालकै विश्व खाद्य कार्यक्रमसम्बद्ध रहेर काठमाडौंमा कार्यरत थिइन् । विशेषतः नेपालमा आएको २०७२ को भूकम्पपछिको विपतको स्थितिमा एकता विश्व खाद्य कार्यक्रमको ‘आपतकालीन राहत कार्यक्रम’मा संलग्न थिइन् । डब्लूएफपीका कार्यकारी निर्देशक डेविड बास्लेले पनि आफ्ना कर्मचारी दुर्घटनामा परेको पुष्टि गरेका छन् ।
WFP Nepal@WFP_NepalWFP stands in solidarity with family members to mourn Ekta Adhikari who died yesterday on the Ethiopian Airline tragedy. A talented humanitarian who brought joy to many lives.
विमान दुर्घटना परि ३३ देशका नागरिक मृत्यु भएको एयरलाइन्सले जनाएको छ । विमान दुर्घटनामा ३२ जना केन्यालीको निधन भएको छ भने १८ जना क्यानाडाका नागरिक रहेका छन् ।
त्यसैगरी, इथोपियन ९ चिनियाँ ८ र ४ जना भारतीय रहेका छन् । राजधानी अतिस अबाबाबाट बिमान उडेको केही समयपछि नै दुर्घटना परेको थियो । विमानमा १ सय ४९ यात्र र ८ जना चालक दलका सदस्य थिए । नेपाल सरकारले विमान दुर्घटनाप्रति दुःख व्यक्त गरेको छ ।
टिकट ढिलाईले जोगिए यी नेपाली
यसैबीच, टिकटमा भएको ढिलाइका कारण इथोपियामा आइतबार भएको विमान दुर्घटनाबाट एक नेपाली भने जोगिएका छन् । दुर्घटनामा परेकै विमानमार्फत सयुंक्त राष्ट्र संघ वातावरण कार्यक्रममा सहभागिताका लागि केन्या जाने तयारीमा रहेका साझा फाउण्डेशनका अध्यक्ष जितेन्द्र जीसी भने टिकटमा भएको ढिलाइका कारण जोगिएका हुन् ।
जिसीले फेसबुकमा कार्यक्रमका लागि प्राप्त टिकटका अनुसार आफू उक्त बिमानमा हुनुपर्ने उल्लेख गर्दै आफू नेपालमै रहेको र ठिक रहेको बताएका छन् । साथै आफ्नो टिकटमा गरिदिएको ढिलाइका कारण उनले सुष्मा दाहाल पोख्रेललाई पनि धन्यवाद दिएका छन् ।
उनले लेखेका छन्, ’म नेपाल मै छु, ठीक छु । कार्यक्रमको तालिका र प्राप्त टिकट अनुसार मपनि यो विमानमा हुनुपर्ने थियो । म आफ्नै कारणले ‘लास्ट आवर’मा आयोजकलाई जानकारी गराएको थिए ।
जब त्यो तालिका, विमान र मलाई प्राप्त टिकट हेरे अनि सम्झिए म अर्को पटक बाँचे । साथमा दान मामा होइसिन्थ्यो । फेरि ढाडस दिँदै केही आफन्त र शुभेच्छुकहरुले गर्नुभएको म्यासेज र चासोका लागी कृतज्ञता प्रकट गर्छु । जानु पर्ने तर, गैइएन भनेर माधव नेपाल ज्यूलाई जानकारी थियो । सुष्मा दाहाल पोख्रेलजीले टिकटमा गरिदिएको ढिलाई पनि धन्यवाद लायक रह्यो ।’
