सत्तारुढ दलबाटै जनमत संग्रहको माग !
सत्तारुढ संघीय समाजवादी फोरम नेपालकी नेतृ सरिता गिरीले जनमत संग्रहको माग उठाएकी छिन् । दुई तिहाइको सरकारले बिखण्डनकारी सीके राउतसँग जनमत संग्रहको सहमति गरेको भन्दै नेतृ गिरीले मधेस केन्द्रित दलहरूले विगतमा उठाएको मागलाई पुनः उठाउनु पर्ने बताएकी हुन् । उनले ‘एक मधेस, एक प्रदेश’को विषयमा जनमत संग्रह गर्नुपर्ने माग गरेकी हुन् ।
सामाजिक सञ्जाल फेसबुकमा सोमबार बिहान स्टाटस लेखेर नेतृ गिरीले भनेकी छिन्, ‘अब मधेशवादी दलहरू समग्र मधेश एक प्रदेशका लागि जनमत संग्रहको माग गर्नु पर्दछ ।’
समग्र मधेस एक प्रदेशको मागलाई जनमत संग्रहबाट टुंगो लगाउनुपर्ने उनको भनाइ छ । सीके राउतलाई चीनले उचालेको टिप्पणी गरेकी नेतृ गिरी सामाजिक सञ्जालमा सक्रिय छिन् । उनले आफ्नो वालमा विभिन्न खालका आपत्तिजनक स्टाटसहरू लेख्ने गरेको भन्दै आलोचना हुँदै आएको छ ।
नेतृ गिरी आबद्ध दल संघीय समाजवादी फोरम नेपालका अध्यक्ष वर्तमान सरकारमा उपप्रधान एवम् स्वास्थ्य तथा जनसंख्यामन्त्री छन् । अध्यक्ष यादवसँग भन्दा फरक मत राख्दै आएकी गिरीलाई कारबाहीका लागि पार्टीभित्र बेलाबेला कुरा उठ्ने गरेको छ ।
