डा. चिरञ्जिवी नेपालको यति धेरै अकुत सम्पती कहाँबाट आयो

 

बैंक तथा वित्तीय संस्थाको नियमन गर्ने अख्यिार प्राप्त निकाय नेपाल राष्ट्र बैंकका गभर्नर डा. चिरञ्जिवी नेपालको अकुत सम्पती रहेको पाइएको छ । पाल्पाको सामान्य किसान परिवारबाट आएका डा.नेपालकोे सबै सम्पती जोड्ने हो भने उनलाई नवकुवेर भन्दा फरक नपर्ने देखिएको छ । गर्भनर नेपालले हालै बुझाएको सम्पती विवरण पढेर राष्ट्र बैंककै अधिकारीहरु तीन छक्क परेका छन् ।

 

सम्पती विवरण अनुसार उनको ललितपुर महानगरपालिकामा मात्रै एक रोपनी भन्दा बढी जग्गा रहेको छ । गभर्नर नेपालकी श्रीमती सुमन नेपालको नाममा ललितपुर महानगरपालिकामा ५ आना २ पैसामा बनेको साढे दुई तले घर रहेको छ । उक्त घर उनले तलव, पारिश्रमिक, सञ्चय कोषलगायतको रकमले खरिद गरेको देखाएका छन् ।

 

यसैगरी, ललितपुरमै सुमन नेपालकै नाममा ११ आना ३ दामको अर्को कित्ता जग्गा रहेको छ । उक्त जग्गा उनले तलव, विदेश भ्रमण, ऋण, पैतृक सम्पती बिक्री गरेर खरिद गरेको देखाएका छन् । ललितपुरमै सुमन नेपालको नाममा दुई आना दुई पैसा जग्गाको अर्को कित्ता पनि रहेका छ । उक्त जग्गा सम्पती विवरणमा उल्लेख भएपनि कुन स्रोतवाट खरिद गरे भन्ने बारेमा भने केही खुलाएका छैनन् ।

 

जग्गामा धनी गभर्नर नेपाल गरगहनामा पनि पनि कुवेर नै देखिएका छन् । उनीसँग ४० तोला सुन छ । अहिलेको बजार भाउ अनुसार उक्त सुनको बजार मूल्य करीब २५ लाख पर्छ । उनले त्यो सुन नोकरी, दाइजो र पैतृक सम्पतीबाट कमाएको उल्लेख गरेका छन् । यसैगरी गभर्नर नेपालसँग हिराको सेट, औठी पनि छ । तर, उक्त सेट कुन स्रोतबाट खरिद गरिएको भनेर उल्लेख गरिएको छैन् । यसैगरी उनीसँग ३०० तोला चाँदी पनि रहेको छ ।

 

गर्भनर नेपालसँग अचल सम्पती मात्र होइन, चल सम्पती पनि अथाह रहेको छ । उनको आफ्नो र श्रीमतीको नाममा मात्रै करीब १४ लाख रुपैयाँ बैंक मौजात रहेको छ । गभर्नर नेपालको माछापुच्छे बैंकको खातामा ७ लाख ७८ हजार रकम रहेको छ । त्यो रकम कुन स्रोतबाट आएको भन्ने उनले खुलाउन सकेका छैनन् । उनकी श्रीमती सुमनको नाममा सिभिल बैंकमा रहेको खातामा ६ लाख १६ हजार रकम रहेको छ । उनले उक्त रकम तलव भत्ता, विदेश भ्रमण, पैतृक सम्पतीबाट प्राप्त भएको उल्लेख गरेकी छिन् ।

 

नेपालले जग्गा, गरगहना तथा बैंक मौजातमात्रै जम्मा गरेका छैनन् ठूलो मात्रामा बिभिन्न बैंक तथा वित्तीय संस्थाहरुको सेयर खरिद गरेका छन् । पुँजी बजारको नियमन गर्ने निकाय नेपाल धितोपत्र बोर्डको अध्यक्ष हुँदा उनमा सेयर मोह पलाएको थियो । त्यसबेलादेखि सेयरको खेलो फड्को गर्न थालेका उनले विभिन्न बैंकको २४८ कित्ता सेयर खरिद गरेका छन् । उनकी श्रीमती सुमनको नाममा पनि विभिन्न बैंक तथा वित्तीय संस्थाको ५७६ कित्ता सेयर रहेको छ ।

 

यसैगरी, छोरी शुभेच्छा नेपालको नाममा पनि बिभिन्न बैंक तथा वित्तीय संस्थाको १६१ कित्ता सेयर खरिद गरेर राखेका छन् । उनीहरुले तलव र भत्ता बचत गरेर सेयर खरिद गरेको जनाएका छन् । पैसाको छेलोखेलो भएका गभर्नर नेपालले साथीभाई तथा आफन्तलाई पनि रकम बाँड्दै लगानी गर्न भ्याएका छन् । उनले साथीभाई तथा आफन्तलाई २० लाख रुपैयाँ ऋण लगानी गरेको देखिएको छ ।

 

नेपाली काँग्रेस नेतृत्वको सरकारकापालामा गभर्नर बनेका नेपालले पछिल्ला दिनका बिलासिताको जिन्दगी विताइरहेका छन् । उनी राष्ट्र बैंकको ७५ लाख पर्ने गाडीमा सयर गर्छन भने गभर्नर नेपालकी श्रीमतीले सुमन नेपालको नाममा आईटेन गाडी रहेको छ । जसको मूल्य अहिले करीब २५ लाखको हाराहारीमा छ । यसैगरी आफूसँग टेलिभिजन, ल्यापटप दुई र मोबाइल तीन थान रहेको पनि गभर्नर नेपालले आफ्नो सम्पती विवरणमा देखाएका छन् ।

 

पछिल्लो समय सरकारले गाडी आयातलाई निरुत्साहित गर्न कुल मूल्यको ५० प्रतिशत मात्र बैंकले लगानी गर्न पाउने नीति ल्याएको छ । सरकारले विदेशबाट आयातित बस्तुलाई निरुत्साहित गर्ने नीति ल्याउने तयारी गरिहेका बेला सरकारको आर्थिक सल्लाहकारको भूमिकामा रहेको राष्ट्र बैंक र त्यसको नेतृत्व सम्हालिरहेका गभर्नर भने बिलासी गाडी चढ्छन् र बैंक तथा वित्तीय संस्थालाई ऋणको चर्को व्याज किन लिएको भन्दै थर्काइरहेका छन् ।

 

पछिल्ला दिनमा देखाएको विलासी चरित्रका कारण बैंकर्सहरुको छाता संगठन नेपाल बैंकर्स संघसँगको सम्बन्ध पनि सुमधुर छैन् । सोही कारण मौद्रिक नीतिको अर्धवार्षिक समीक्षा मध्यराति मात्र खुसुक्क राष्ट्र बैंकको वेभसाइडमा राखेर उनले कुलेलम ठोक्नु परेको थियो । नियमक निकायले मध्यरातमा मौद्रिक नीतिको अर्धवार्षिक समीक्षा गर्नुले पनि उनको हविगत के छ भन्ने प्रष्ट हुँदै गएको छ । लगानीयोग्य रकम तरलताको अभाव खेपिरहेका बैंकहरुलाई राहत हुने किसिमको नीति ल्याउनु पर्नेमा राष्ट्र बैंकका गभर्नर बिलासितामै रम्न पुग्नुलाई बैंकर्सहरु अचम्म मानिरहेका छन् ।

 

राष्ट्र बैंकका गभर्नरले अवकास पछि पनि आफुले चढ्दै आएको गाडी घर लैजान पाउने सुविधा भएकाले उनले अहिलेदेखि नै बिलासी गाडी रोजेर चढन थालेको राष्ट्र बैंक स्रोतको भनाइ छ । गभर्नर नेपालको कार्यकाल समाप्त हुन एक वर्ष मात्रै छ । उनी आगामी वर्ष २०७६ को चैत ७ गते गभर्नरबाट विदा हुँदै छन् । गभर्नरबाट अवकास पाएपछि पनि अहिले उनले चढदै आएको गाडी लान पाउने छन् ।

 

त्यतिमात्रै होइन, केही समय अघि मात्रै कार्यालयमा आउने पाहुना ओसार पसारका लागि समेत २ वटा गाडी खरिद गरेका छन् । गभर्नर नेपालले डेढ करोड भन्दा माथि मूल्यका २ वटा टोयोटा गाडी खरिद गरेर पाहुना आसोर पसार गरिरहेका मात्रै छैनन्, श्रीमती, आफन्तसमेतलाई सेवा दिइरहेका छन् ।

 

उच्च मूल्यका बिलासी गाडी खरिद गर्नु केन्द्रीय बैंकको नीति विपरित हो । तर, उनले त्यस्तो नीतिलाई धज्जी उडाउँदै नयाँ गाडी खरिद गरेर पाहुनालाई भन्दा श्रीमतीलाई बढी सेवा दिएका छन् । अकुत सम्पतीका धनी गभर्नर नेपाल पछिल्लो समय राष्ट्र बैंकलाई दुहुनो गाई जस्तै बनाएका छन् । नेपालको कानुन अनुसार दाईजो लिनदिन पाइदैन । तर उनले सम्पती विवरणमा सो कुरालाई उल्लेख गरेर कानुनको समेत धज्जी उडाएका छन् ।प्रकाश खबरबाट