नेकपा सांसदलाई समिमको जवाफ : कुनै हालतमा पछाडि हट्दिनँ
मुस्लिम आयोगका प्रस्तावित अध्यक्ष समिम अन्सारीले स्वेच्छिक रुपमा पछि नहट्ने बताएका छन् । नागरिकतामा आफ्नो कारण नभई अरुका कारण प्रश्न उठेको भन्दै छानबिन गर्न चुनौती दिए ।
संसदीय सुनुवाई विशेष समितिमा सत्तारुढ नेकपाका सांसदहरु योगेश भट्टराई र सुरेन्द्र पाण्डेले भोलि कानुनी समस्या आउने भन्दै स्वेच्छिक रुपमा पछि हट्न सुझाएका थिए । तर, अन्सारीले त्यसलाई अस्वीकार गरेका छन् । उनले भने, ‘म कुनै हालतमा ब्याक हुन्न । मैले कुनै त्रुटि गरेको छैन ।’
नागरिकताबारे उठाइएको प्रश्न आफ्नो कारण नभएको उनले बताएका छन् । उनले यसबारे छानविन गर्न सुनुवाई समितिलाई चुनौती दिएका छन् ।
अन्सारीको नागरिकतामा फरक फरक जन्ममिति हुनुका साथै शैक्षिक प्रमाणपत्र भारतीय भेटिएको थियो ।
उनले आयोगको अध्यषमा सिफारिस हुनु दुई दिन अघि नै आफूले केन्द्रीय सदस्यबाट राजीनामा दिएको तर, पार्टीले निर्णय गर्न ढिला गरेको बताएका छन् ।
६ माघमा मुस्लिम आयोगको अध्यक्ष सिफारिस हुँदासम्म उनी नेकपाको केन्द्रीय सदस्य र प्रतिनिधिसभा सदस्यको समानुपातिकको बन्दसूचीमा थिए ।
