भारत–पाक तनाव : नेपालको सीमा क्षेत्र र विमानस्थलमा उच्च सुरक्षा सतर्कता

 

भारत र पाकिस्तानबीच तनाव बढेपछि नेपालले पनि सुरक्षा सतर्कता बढाएको छ । तनावका बीच हुनसक्ने घुसपैठलाई मध्यनजर गरेर सुरक्षा संयन्त्र चनाखो भएको हो ।

 

नेपाल प्रहरीका केन्द्रीय प्रवक्ता एसएसपी उत्तमराज सुवेदीले त्रिभुवन अन्तर्राष्ट्रिय विमानस्थल र मुलुकभरका सीमा जोडिएका क्षेत्रका प्रहरी कार्यालयहरुलाई अलर्ट हुन निर्देशन दिइसकिएको बताए ।

 

गलत मान्छेको आवतजावत नहोस् भनेर पनि सतर्कता अपनाइएको हो । यस्तो अवस्थामा अपराधिक गतिविधिमा संलग्नले पनि फाइदा उठाउन सक्ने सम्भावना हुन्छ’, सुवेदीले अनलाइनखबरसँग भने, ‘त्यसैले सुरक्षा व्यवस्थालाई थप प्रभावकारी बनाएका हौं ।’ उनका अनुसार कोही शंकास्पद मानिसहरु फेला पर्ने वित्तिकै तत्काल नियन्त्रणमा लिनसमेत निर्देशन दिइएको छ ।

 

यसअघि मंगलबार भारतीय वायु सेनाको एक लडाकु विमानले पाकिस्तानी क्षेत्रमा पसेर बम विष्फोट गराएको थियो । भारतले ३५० चरमपन्थी मारिएको दाबी गरेको थियो भने पाकिस्तानले त्यसको खण्डन गरेको छ । तर, भारतले आफैं सम्प्रभुता उल्लंघन गरेको भन्दै आफ्नो अनुकुल समय र स्थानमा जवाफ दिने बताएको थियो ।

 

बुधबार नियन्त्रण रेखा एलओसी पार गरेर घुसपैठ गरेका भारतीय वायुसेनाको दुई विमान खसालेको पाकिस्तानी सेनाले दाबी गरेको छ । उसले एक जना पाइलटलाई पनि पक्राउ गरेको दाबी गरेको छ ।

 

भारत–पाकिस्तानबीचको तनावले नेपालको उडान प्रभावित, कुन कुन एयरलाइन्स रोकिए

 

भारत र पाकिस्तानबीच बढ्दो तनावले काठमाडौंमा त्रिभुवन विमास्थलबाट हुने उडान प्रभावित भएको छ । पाकिस्तानले भारतको बाटो हुँदै आफ्नो एयर रुटमा प्रवेश गर्न रोक लगाएपछि नेपालबाट भारत हुँदै पाकिस्तानको रुट प्रयोग गर्नुपर्ने विमानको उडान प्रभावित भएको हो ।

 

पाकिस्तानले भारतबाट प्रवेश गरेर आफ्नो रुट प्रयोग गर्न अनुमति नदिएपछि हाल नेपालबाट उड्नुपर्ने टर्किस एयरलाइन्स विमानस्थलमै रोकिएको छ । यस्तै कतार एयरलाइन्सको उडान पनि प्रभावित हुने अवस्था आएको त्रिभुवन विमानस्थल स्रोतले जनाएको छ ।

 

टर्किस एयरलाइन्सलाई अब विकेड रुटबाट पठाउन लागिएको विमानस्थलका प्रमुख राजकुमार क्षेत्रीले बताए । उनले विमानस्थलहरुमा कुनै पनि समस्या नरहेको बताउँदै पाकिस्ताले आफ्नो रुट प्रयोग गर्न रोकेकाले वैकल्पिक रुट प्रयोग गरेर टर्किस एयरलाई उडाउन लागिएको जानकारी दिए । ‘यात्रुको आवमागमनका कमी आएको छैन । अरु खालका कुनै प्रभाव विमानस्थलमा देखिएको छैन,’ क्षेत्रीले भने ।

यसैबीच भारत पाकिस्तान तनावका कारण भारतका पाँचवटा एयरपोर्टमा सर्वसाधारणको उडान प्रभावित भएको छ । भारतको श्रीनगर, जम्मु, लेह, अमृतसर र चण्डीगढ एयरपोर्टको उडान प्रभावित भएको हो ।

 

भारतलेपनि पाकिस्तानी लडाकु विमान खसाल्यो

 

बुधबार बिहान भारतीय सीमाक्षेत्र उल्लंघन गरेको पाकिस्तानी लडाकु विमान भारतले खसालेको दाबी गरेको छ । भारतीय वायुसेनाले एफ–१६ लाई खसोलेको भारतीय मिडियाले दाबी गरिरहेका छन् । ताजा स्थितीपछि काश्मिरको पूरा एयर फिल्ड सील गरिएको छ ।

भारत घुस्यो पाकिस्तानी २ लडाकू विमान

भारत–पाकिस्तान तनाब बढीरहेकै बेला पाकिस्तानी लडाकू विमान भारत छिरेका छन् । भारतीय सञ्चारमाध्यमका अनुसार पाकिस्तानी २ लडाकु सेनाको विमान भारत छिरेको हो ।

 

सीमा क्षेत्र पार गरेर पाकिस्तानी लडाकु विमान भारत छिरेपछि सुरक्षा व्यवस्था कडा बनाइएको छ । यस्तै भारतको जम्मु श्रीनगर र पठानकोटको विमानस्थलका सम्पूर्ण उडान रद्द गरिएको समाचारमा उल्लेख छ । जम्मु कश्रिमरको साथमा पञ्जाबको विमानस्थलका उडानहरु पनि रद्द गरिएको छ ।

 

पाकिस्तानी जेट फाइटर विमान लाइन अफ कन्ट्रोल (एलओसी) पार गरेर भारत छिरेर फर्किएको छ । यसअघि मंगलबार बिहान भारती वायुसेनाको विमान पनि एलओसी पार गरेर पाकिस्तान छिरेको थियो