खतिवडाको ठाउँमा सुरेन्द्र पाण्डे लैजाने तयारी, रबिन्द्रलाई हटाएर गोकुल बास्कोटालाई जिम्मा दिने
सत्तारुढ दल नेपाल कम्युनिष्ट पार्टी (नेकपा) का अध्यक्षद्धय केपी शर्मा ओली र पुष्पकमल दाहाल प्रचण्डबीच मन्त्रीहरु हटाउने र जिम्मेवार हेरफेर गर्नेबारे छलफल भएको छ ।
प्रधानमन्त्री निवास बालुवाटारमा भएको छलफलमा केही मन्त्रीहरु हटाउने र नयाँ मान्छे नियुक्ती गर्नेबारे दुई अध्यक्षहरुबीच गम्भिर कुराकानी भएको स्रोतको दाबी छ ।
तत्काल संस्कृति, पर्यटन तथा नागरिक उड््ययनमन्त्री रवीन्द्र अधिकारीलाई हटाउने निश्कर्षमा अध्यक्षद्धय पुगेको नेकपाका एक नेताले जानकारी दिए । रवीन्द्रको ठाउँमा सञ्चारमन्त्री गोकुल बाँस्कोटालाई लैजाने तयारी भएको छ ।
त्यस्तै, लालबाबु पण्डितलाई पनि हटाउनेबारे छलफल भएको बुझिएको छ । उता, संघीय समाजवादी फोरम नेपालका अध्यक्षसमेत रहेका उपप्रधानमन्त्री एवम् स्वास्थ्य मन्त्री उपेन्द्र यादवलाई स्वास्थ्यबाट परराष्ट्रमा ल्याउने तयारी भएको छ ।
परराष्ट्रमन्त्री प्रदिप ज्ञवालीलाई सञ्चार मन्त्रालयमा लैजाने तयारी छ । अर्थमन्त्री डा. युवराज खतिवडालाई पनि हटाएर पूर्व अर्थमन्त्री सुरेन्द्र पाण्डेलाई लैजाने ओली–प्रचण्डको तयारी छ ।
बालुवाटारमा मन्त्री फेरबदलको अन्तिम गृहकार्य, गृहमा जनार्दनको चौका, को कहाँ पुगे
वर्तमान दुई तिहाईको सरकारले माइलेज लिन नसक्दा पार्टीभित्र र बाहिर चर्काे आलोचना भइरहेका बेला मन्त्री फेरबदलको अन्तिम गृहकार्य बालुवाटारमा भइरहेको छ । नेकपाका दुई अध्यक्षले नयाँ मन्त्री ल्याउने र मन्त्रालय फेरबदल गर्ने तयारी गरेका छन् ।
‘सम्भवत केही मन्त्रीका लागि अब बस्ने मन्त्रिपरिषदको बैठक अन्तिम हुन्छ होला’ बालुवाटार निकट स्रोतले भन्यो ‘बढिका तीन जना नयाँ अनुहार ल्याउने तयारी भएको छ भने केही मन्त्रीको जिम्मेवारी पनि हेरफेर हुने भएको छ ।’ नयाँमन्त्रीमा जनार्दन शर्मा र सुरेन्द्र पाण्डेका नाममा सहमति भइसकेको छ । तर अन्य एकको नाम भने अझै टुंगो लागेको छैन ।
नयाँ तीन मन्त्री थपिने भएपछि वर्तमान तीन मन्त्री विदा हुने भएका छन् । विदा हुनेको सूचिमा भौतिक योजनामन्त्री रघुविर महासेठ, संस्कृति पर्यटन तथा नागरिक उड्यनमन्त्री रविन्द्र अधिकारी र कृषिमन्त्री चक्रपाणी खनालको नाम रहेको छ ।
अर्थमन्त्री डा. युवराज खतिवडालाई पनि विदा दिने पक्षमा नेकपा अध्यक्ष पुष्पकमल दाहाल प्रचण्ड रहेका छन् । तर अर्थमन्त्री खतिवडाले परिणाम निकाल्न केही समय मागेपछि प्रधानमन्त्री केपी शर्मा ओलीको मनसाय फेरिएको छ । खतिवडालाई एउटा मौका दिन सोचमा उनी पुगेका छन् ।
रिक्त रहेका मन्त्रालयमै नयाँ मन्त्रीको पदपुर्ति भने नगरिने बालुवाटार स्रोतले जनाएको छ । लगभग आधाभन्दा बढि मन्त्रीको जिम्मेवारी हेरफेर गर्ने तयारी नेकपाका दुई अध्यक्षले गरेका छन् ।
मन्त्रीको हेरफेरमा गृहमन्त्री रामबहादुर थापा, परराष्ट्रमन्त्री प्रदीप ज्ञवाली, सुचना प्रविधिमन्त्री गोकुल बास्कोटा पर्ने लगभग निश्चित छ । गृहमन्त्रीमा जनार्दन शर्मालाई ल्याउने दुई अध्यक्षबीच सहमति भइसकेको छ भने सुरेन्द्र पाण्डेका बिषयमा मन्त्रालय टुंगीसकेको छैन । अध्यक्ष पुष्पकमल दाहाल प्रचण्ड भने पाण्डेलाई अर्थमन्त्री नै बनाउन चाहेका छन् । अर्का अध्यक्ष तथा प्रधानमन्त्री ओली डा. खतिवडालाई नै अहिलेलाई जिम्मा दिने पक्षमा छन् ।
भौतिक मन्त्रालयको जिम्मा रामबहादुर थापालाई दिने तयारी गरिएको छ भने पर्यटनमन्त्रीको जिम्मा गोकुल बास्कोटालाई दिने तयारी गरिएको छ । भौतिक मन्त्रालयमा प्रदीप ज्ञवालीले पनि दावी गरिरहेका छन् ।
