अर्थमन्त्री डा.युवराज खतिवडाले राजीनामा दिने !

 

 

अर्थमन्त्री डा.युवराज खतिवडाले राजीनामा दिने धम्की दिएका छन् ।

कम्युनिस्ट प्रधानमन्त्री केपी शर्मा ओलीले मन्त्रिमण्डल पुनर्गठन गर्ने र त्यसबाट अर्थमन्त्री खतिवडालाई समेत हटाउने चर्चा चलिरहेका बेला अर्थमन्त्री आफैंले ओलीलाई भेटेर राजीनामा दिने धम्की दिएका छन् ।

पार्टीभित्र र बाहिर आफ्नो चर्काे आलोचना भएपछि प्रधानमन्त्री केपी शर्मा ओलीलाई भेटेर अर्थमन्त्रीले राजीनामा दिने बताएका छन् ।

अर्थमन्त्री डा। खतिवडाले केही दिन अगाडि नै प्रधानमन्त्री ओलीलाई आफूले ‘मार्ग प्रशस्त गर्ने’ जानकारी गराएका स्रोतको दाबी छ । तर प्रधानमन्त्री ओलीले अर्थमन्त्री डा। खतिवडालाई काम गरिरहन भनेका थिए । ओलीले काम गरिरहन भनेपनि खतिवडा काम गर्ने मुडमा छैनन् ।

प्रधानमन्त्री ओलीले डा। खतिवडालाई अर्थमन्त्रीको जिम्मेवारी दिँदा नै पार्टीभित्र असन्तुष्टि बढेको थियो । तत्कालीन नेकपा एमालेका महासचिव ईश्वर पोखरेल नै अर्थमन्त्री हुन चाहेका समाचार सार्वजनिक भएका थिए । तत्कालीन एमालेका सचिव प्रदीप ज्ञवाली पनि अर्थमन्त्री बन्ने लविङमा रहेको भनिएको थियो ।

अनुमान विपरीत एकाएक खतिवडा अर्थमन्त्री बनेका थिए । उनले बृद्धभत्ता बृद्धि लगायतका चुनाबी नारालाई कार्यान्वयन गर्न नसकेपछि अर्थमन्त्री खतिवडाको संसदकै सत्तापक्षीय सांसदले आलोचना गरेका थिए । प्रधानमन्त्री ओलीले अर्थतन्त्र बुझेको व्यक्ति भन्दै डा। खतिवडालाई अर्थमन्त्रीमा नियुक्त गरे । डा। खतिवडा २०७४ फागुन ४ गते अर्थमन्त्री बनेका थिए । डा। खतिवडा अर्थमन्त्री बनेपछि गत जेठ १५ गते बजेट ल्याएका थिए ।

पछिल्लो समय उद्योगी व्यवसायीले अर्थमन्त्रीलाई ‘क्रस’ गरेर सिधै प्रधानमन्त्री भेट्न थालेपछि डा। खतिवडा निरास बनेको स्रोतले बतायो । अर्थमन्त्री डा। खतिवडाले आफूहरूका उचित माग पनि सम्बोधन नगरिदिएको र आफूहरुको कुरै नसुनेको भन्दै उद्योगी व्यवसायी सिधै प्रधानमन्त्रीलाई भेटेर आफ्नो माग पूरा गराउन थालेपछि अर्थमन्त्रीको असन्तुष्टि बढेको बताइएको छ ।

गत भदौ तेस्रो साता चिनी उद्योगीले प्रधानमन्त्री ओलीलाई भेटेर चिनीको भन्सार महसुल बृद्धि गर्न र चिनी आयातमा परिमाणात्मक बन्देज लगाइदिन आग्रह गरेका थिए । उद्योगीको माग अनुसार नै सरकारले असोजदेखि नै चिनीमा वार्षिक एक लाख टन मात्रै आयात गर्न पाउने र भन्सार दर साविकको १५ प्रतिशतबाट बढाएर ३० प्रतिशत बनाउने निर्णय गरेको थियो ।

अर्थमन्त्री डा। खतिवडा अब अर्थमन्त्रीको जिम्मेवारीबाट हट्न चाहेका उनी निकट स्रोत बताउँछ । स्रोतका अनुसार डा। खतिवडाले सो कुराको प्रधानमन्त्री ओलीलाई भेटेर मौखिक जानकारी नै गराएका छन् ।

डा। खतिवडाले आफूले बाहिरबाट पनि प्रधानमन्त्री ओलीलाई सक्दो सहयोग गर्ने जानकारी गराएका छन् । डा। खतिवडाले पार्टीकै नेता अर्थमन्त्री हुँदा काम गर्न अझ सहज हुने प्रधानमन्त्रीलाई सुझाएको बताइएको छ ।