हाम्रो इकोनोमि

 

ललितपुरको नख्खुस्थित एनसेलको मुख्यालयलाई लक्षित गर्दै भएको बम विस्फोटमा एनसेलकै सुरक्षा गार्डको मिलेमतोको रहस्य खुलेको छ । अनुसन्धानका क्रममा एनसेलका सुरक्षा गार्डको चरम लापरवाही र मिलेमतो रहेको प्रारम्भिक अनुसन्धानबाट देखिएको प्रहरीको दाबी छ । सुरक्षा गार्डको साँठगाँठ देखिएपछि प्रहरीले २ जना सुरक्षा गार्डलाई नियन्त्रणमा लिइएको प्रहरीले जनाएको छ ।

 

अज्ञात समूहले बम राखेर गएपछि सुरक्षा गार्डले प्रहरीमा समेत जानकारी गराएका थिएनन् । एनसेल मुख्यालयबाट २ सय मिटरजति टाढा रहेको नख्खु प्रहरीमा पनि उनीहरुले जानकारी नगराएको प्रहरीले जनाएको छ ।

 

बम पड्किएपछि नख्खु प्रहरी र स्थानीयले कन्ट्रोलमा खबर गरेका थिए । बल्खुमा रहेका ललितपुरका एसएसपी रविन्द्र धानुक ५ मिनेटमा नै एनसेलको मुख्यालयमा पुगेर घाइतेहरुको उद्धारमा जुटेका थिए ।

 

उच्च प्रहरी स्रोतका अनुसार सुरक्षा गार्ड मात्र होइनन, बम पडकिएपछि एनसेलकै उच्च अधिकारीहरु प्रहरी सम्पर्कमा आउन नै चाहेका छैनन् । जसका कारण प्रहरीलाई अनुसन्धान गर्न समस्या परिरहेको छ ।

 

ललितपुर प्रहरीले एनसेलका सुरक्षा शाखाका प्रमुख महेन्द्र भट्टचनसँग वयान लिने तयारी गरेको छ । भट्टचन सशस्त्र प्रहरीबाट अवकाश प्राप्त डिआइजी हुन् । शुक्रबारराती प्रहरीले सर्च अभियान चलाएर थप ४ जनालाई पनि पक्राउ गरेको छ । बम विस्फोट गराएपछि त्यसको अनुसन्धानमा प्रहरीको ४ वटा टोली खटेको छ ।

 

केन्द्रीय अनुसन्धान ब्युरो सिआइबी, महानगरीय अपराध महाशाखा, प्रहरीकै विशेष ब्युरो र महानगरीय प्रहरी परिसर ललितपुरले छुट्टाछुट्टै टोली खटाएको छ । शनिबार अदालत बन्द भएपछि प्रहरी अनुसन्धानमा कठिनाइ भएको प्रहरीले जनाएको छ । ब्यक्तिका कल डिटेल लिनका लागि प्रहरीले अदालतबाट अनुमति माग्नुपर्ने प्रावधान छ ।

 

बम विस्फोटमा परेर लमजुङका सिंहबहादुर गुरुङको मृत्यु भएको छ भने अन्य २ जना घाइते भएका छन् । प्रतिक्षा खड्का र उरुषा मानन्धरको अस्पतालमा उपचार भइरहेको छ ।

 

 नेविसंघ झडपस्थलमा पत्रकारमाथि लाठीचार्ज

 

नेपाली काँग्रेसको केन्द्रीय कार्यालय सानेपामा नेविसंघ दुई समूहबीच भएको झपडमा प्रत्रकार पनि घाइते भएका छन् । समाचार संकलन गर्न गएका पत्रकार केवश सावदमाथि प्रहरीले लाठीचार्ज गरेको हो । प्रहरीको लाठीचार्जबाट पत्रकार सावदलाई चोट लागेको छ ।

 

आइतबार दिउँसो पार्टी कार्यालय सानेपामा सिटौला समूह र संस्थापन समूहका विद्यार्थी नेताबीच विवादपछि झपड भएको थियो । पार्टी कार्यालयभित्र विद्यार्थी नेताहरुलाई प्रवेश निषेध गरिएको छ । संस्थापन पक्षका विद्यार्थीहरु नेविसंघमा ३२ वर्षे उमेरहद ल्याउन नहुने पक्षमा छन् भने सिटौला समूह त्यसको विपरीत छ ।

 

दुई समूहबीच विवाद बढ्दै गएपछि ढुङ्गा हानाहान समेत भएको थियो । पार्टी कार्यालय पुगेका संस्थापन पक्षको ब्यानर निवर्तमान महामन्त्री कुन्दन काफ्ले समूहले च्यातिदिएपछि २ पक्षबीच झडपको स्थिति बनेको प्रहरीले जनाएको छ ।

अहिले प्रहरीले प्रदर्शनकारी विद्यार्थीलाई तितरवितर पारेको छ । निवर्तमान महामन्त्री काफ्ले निकट विद्यार्थी नेताले उमेर हदको पक्षमा र संस्थापन पक्षले उमेर हदको विपक्षमा नेपाली काँग्रेस केन्द्रीय कार्यालय सानेपामा प्रदर्शन र घेराबन्दी गरेपछि प्रहरीले बल प्रयोग गरेको हो । काफ्ले समूहले ३२ वर्ष मुनिको तदर्थ समिति गठनको माग गर्दै आइतबार बिहानैबाट नाराबाजी गरेको थियो ।