एकता टुंग्याउन नेकपाको सचिवालय बैठकमा यसरी छलफल, कार्यदल सदस्यपनि सहभागी
सत्तारुढ नेपाल कम्युनिस्ट पार्टी (नेकपा)को सचिवालय बैठक बसिरहेको छ । एकता प्रक्रियाको टुंगो लगाउन कार्यदलसहित बसिरहेको सचिवालयको बैठकमा यसविषयमा छलफल भईरहेको हो ।
पार्टी एकतामा ढिलाइ हुँदा कार्यकर्ता तहबाट चर्को दवाव परेपछि अध्यक्षद्वय केपी शर्मा ओली र पुष्पकमल दाहाल प्रचण्डले लामो गृहकार्यपछि आज स्थायी समितिद्वारा गठित कार्यदलका सदस्यसहित सचिवालय बैठक बोलाउनु भएको थियो ।
प्रधानमन्त्री निवास बालुवाटारमा जारी बैठकमा एकीकरण टुंगो लगाउने मापदण्डका विषयमा छलफल भईरहेको छ । आज बस्ने बैठकले एकताको ठोश निर्णय लिने बताइएको छ ।
गत फागुन ६ गते बसेको सचिवालय बैठकमा कार्यदलको प्रतिवेदन प्रस्तुत भएपछि एक पटक कार्यदलका सवै सदस्यलाई आमन्त्रण गरी सचिवालय बैठक एकताको टुंगो लगाउने निर्णयअनुसार आज सचिवालयमा आमन्त्रण गरिएको हो ।
तीन महिनामा सवै तहको साँगठानिक एकता टुंगो लगाउने घोषणा गरेपनि लामो समयसम्म एकीकरण हुन नसकेपछि नेतृत्वमाथि चाँडो टुंगो लगान दवाव परिरहेको छ ।
आजको बैठकमा कार्यदलमा संयोजक रहनुभएका सचिवालय सदस्य रामबहादुर थापा र महासचिव बिष्णु पौडेलबाहेक अन्य सात सदस्यलाई आमन्त्रण गरिएको हो ।
कार्यदलमा थापा र पौडेलसहित शंकर पोखरेल, योगेश भट्टराई, सुरेन्द्र पाण्डे, रघुबीर महासेठ, बेदुराम भुसाल, बर्षमान पुन र लेखराज भट्ट हुनुहुन्छ ।
