सत्तारुढ नेपाल कम्युनिस्ट पार्टीका नेता तथा प्रतिनिसभाको शिक्षा स्वास्थ्य समितिका सदस्य योगेश भट्टराईले चिकित्सा शिक्षा बिधेयक संसदबाट पारित हुँदा डा.गोविन्द केसीको ऐतिहासिक जित हुने भन्दै उत्सव मनाउन आग्रह गरेका छन् ।

 

डा.गोविन्द केसीले अनसनस्थलबाट सांसदहरुलाई बिधेयक पारित नगर्न भिडियो अपील सार्वजनिक गरे लगत्तै नेकपा नेता भट्टराईले केसीको भावना अनुरुपनै बिधेयक पारित गर्न लागिएको बताएका छन् । केसी र भट्टराई दुवैले आ-आफ्ना आग्रह सामाजिक सञ्जालबाट सार्वजनिक गरेका हुन् ।

 

भट्टराईले चिकित्सा शिक्षक विधेयकलाई विद्यार्थी र जनतामुखी बनाउन गरेको अपीललाई स्वागत र सम्मान गर्दै कुनै कमिकमजोरी रहेमा केसी जस्तै व्यक्तित्वको सुझावमा सुधार गर्दै लैजाने कुरामा ढुक्का हुन अनुरोध गरेका छन् ।

 

उनले भनेका छन–यसअघि बनेका बिभिन्न आयोग, समिति तथा कार्यदका सुझाव, बिभिन्न राजनीतिक दल, संघ संगठनका सुझाव र माननीय सदस्यहरुको संशोधन प्रस्ताव अनि तपाईंले गर्नुभएको आन्दोलन समतेका आधारमा बिधेयक राष्ट्र, जनता र विद्यार्थीको हितमा रहेको कुरा यहाँलाई बिश्वास दिलाउन चाहान्छु ।

 

अनसनको बेडबाटै डा केसीको माननीयहरुलाई अपील

१४ दिनदेखि १६ औं चरणको आमरण अनुसनमा बसिरहेका सत्याग्रही डा गोविन्द केसीले शिक्षण अस्पताल महाराजगञ्जको बेडबाटै माननीयहरुलाई अपील गरेका छन् ।

 

उनले मंगलबार चिकित्सा शिक्षा विधेयक संसदमा प्रस्तुत गर्दै गरेको जानकारीमा आएको हुनाले त्यसमा जनतामुखी र विद्यार्थीमुखी बुँदाहरु समेटेर विधेयक पारित गर्नेमा आशावादी रहेको बताएका छन् ।

उनले भनेका छन् –‘जनतामुखी र विद्यार्थीमुखी बुँदाहरु हटाएर माफियामुखी बुँदाहरु राखेर समितिले पारित गरेको छ । हामीसंग सम्झौता भए अनुसार जनतामुखी र विद्यार्थीमुखी बुँदाहरु फेरि थपेर माननीय ज्यूहरुले जनतामुखी र विद्यार्थीमुखी ऐन ल्याउन सहयोग गर्नुहुनेछ भन्ने आशा राखेको छु । र म अनुरोध पनि गर्न चाहन्छु ।’