रक्सी पिएर मञ्चमा उक्लिएका कांग्रेसका नेताहरूलाई रामधुलाई
ओखलढुंगा जिल्लामा आसन ग्रहणको विषयमा विवाद हुँदा नेपाल विद्यार्थी संघ जिल्लाको १२औं अधिवेशनको उदघाटन सत्रमा कांग्रेसका नेताहरूबीच कुटाकुट भएको छ ।
ओखलढुंगामा सोमबार साँझ मञ्चमै भएको कुटाकुटमा कांग्रेस वरिष्ठ नेता रामचन्द्र पौडेल समूहका नेता बालकृष्ण दाहालले कुटाइखाएका छन् । उनको चस्मा पनि फुटेको छ ।
दाहालले आँखामा चोट लागेको र सामुदायिक अस्पतालमा परीक्षण गरेको बताएका छन् । दाहालसहितको समूहले रक्सी पिएर मञ्चमा उक्लिएर कार्यक्रम विथोल्न खोजेपछि सभापति शेरबहादुर देउवा समूहले रामधुलाई गरेको प्रत्यक्षदर्शीले जानकारी दिए ।
कार्यक्रम विथोल्न खोज्ने ओखलढुंगाको पूर्वसभापति गोमा केसीमाथि पनि कुटपिट भएको छ । केसीले पत्रकार सम्मेलनमा आफूमाथि जिल्ला सभापति प्रदीप सुनुवारले हातपात गरेर आरोप लगाइन् ।
नेविसंघका केन्द्रीय उपाध्यक्ष नवीन राईलाई प्रमुख अतिथि बनाउनुपर्ने कुरामा विवाद भएको थियो । जिल्ला सभापति प्रदीप सुनुवारलाई प्रमुख अतिथि बनाएपछि विवाद सुरु भएको थियो ।
मञ्चमा जिल्ला सभापति प्रदीप सुनुवार, उपसभापति तेजेन्द्र खनाल र नेताहरू बालकृष्ण दाहाल, लीलाबल्दभ दाहाल, पूर्व सभापति गोमा केसीबीच झडप भएको प्रत्यक्षदर्शीले बताएका छन् ।
झडपपछि असन्तुष्ट पक्षले नेविसंघको कार्यक्रम बहिस्कार गरेका छन् । नेताहरूको कुटाकुटपछि विद्यार्थीसमेत दुई पक्षमा विभाजित भएका छन् । विद्यमान पदाधिकारी तथा प्रतिनिधि आएका विद्यार्थीहरु पक्ष विपक्षमा बाँडिए पनि अधिवेशनको बन्द सत्र भने सञ्चालन भएको छ ।
संस्थापन पक्षले विधी मिचेर अधिवेशन गरेको भन्दै विवादपछि असन्तुष्ट पक्षका नेताहरुले सोमबार साँझ पत्रकार सम्मेलन गरेर जिल्ला सभापति प्रदीप सुनुवार र उपसभापति तेजेन्द्र खनालको राजीनामा माग गरेका छन् ।
कांग्रेस ओखलढुंगाका जिल्ला सभापति प्रदीप सुनुवारले मादक पदार्थ सेवान गरेका केही व्यक्तिहरू घुसाएर पार्टी हितविरुद्ध लागेका तत्वहरूले आफूमाथि आक्रमण प्रयास गरेको बताए ।
सभापति सुनुवारले आफूमाथि आक्रमण प्रयास गर्नेहरूलाई अनुशासनको कारवाही गर्ने चेतावनी दिएका छन् । लामो समयदेखि आन्तरिक विवादमा अल्झिएको कांग्रेसको विवाद अहिले आएर झडपमा पुगेको छ । संसदीय निर्वाचनमा असहयोग गरेको भन्दै असन्तुष्ट पक्षका केही नेताहरुलाई भने जिल्ला समितिले यसअघि नै कारवाही गरेको पनि सभापति सुनुवारले बताएका छन् ।
आज बिहानैबाट वर्षा र हिमपात, चिसो बढ्यो, काठमाडौंमा वर्षा हुने पूर्वानुमान
आज बिहानैदेखि सुदूरपश्चिम लगायत पश्चिमी क्षेत्रमा वर्षा भएको छ भने काठमाडौं उपत्यकासहित पश्चिम नेपालको मौसम बदली भएको छ ।उपत्यकामा सामान्य र पश्चिमका धेरैजसो ठाउँको मौसम पूर्णरुपमा बदली भएको जल तथा मौसम पूर्वानुमान महाशाखाले जनाएको छ ।
पश्चिमी वायुको प्रभावका कारण पहाडी जिल्लामा हल्का वर्षा र हिमाली जिल्लामा हिमपातको सम्भावना रहेको मौसमविद् शान्ति कँडेलले जानकारी दिए । काठमाडौं उपत्यकामा भने बेलुकी वा रातिसम्ममा फाट्टफुट्ट पानी पर्ने सम्भावना रहेको पनि उनले बताए ।
मंगलबारदेखि पश्चिमी वायुको प्रभाव नेपालतिर सरेकाले हल्का वर्षा र हिमपातको सम्भावना बढेको हो । अहिले काठमाडौं उपत्यकाको न्यूनतम तापक्रम ५ डिग्री सेल्सियस रहेको छ । वर्षा र हिमपात भएपछि चिसो बढेको छ । हिजोसम्म बिहानै घाम लाग्ने भएकाले चिसो घटेको थियो ।
