को हुन् टाउकोको मूल्य १ लाख तोकिएका नेपाली लामा ? भारतमा पक्राउ परेको खुलासा
नेपाली महिलालाई खाडी राष्ट्रमा लगेर बेच्ने कार्यमा संलग्न भएको आरोप लागेका लोप्साङ लामालाई भारतीय प्रहरीले शनिबार पक्राउ गरेको छ । लामाको टाउकोको मूल्य १ लाख रुपियाँ तोकिएकोसमेत भारतीय प्रहरीलाई उद्धृत गर्दै भारतीय सञ्चारमाध्यमले सोमबार जनाएका छन् । उनी वाजिराबाद भन्ने स्थानमा बस्दै आएको समाचारमा जनाइएको छ ।
लामा नेपालको ओखलढुंगाबाट त्यहाँ गएको भारतीय प्रहरीले जनाएको छ । उनी लामो समयदेखि नेपाली महिलाको बेचबिखनमा संलग्न रहेको जनाइएको छ । गएको जुलाई २५ तारेखमा दिल्ली महिला आयोगको एक प्रतिनिधि मण्डलले १६ जना नेपाली महिलालाई मुनिर्का भिलेजबाट उद्धार गरेको थियो । सोही सम्बन्धी एउटा केस वसन्त विहार प्रहरी स्टेसनमा दर्ता गरिएको थियो ।
प्रहरी विशेष सेलका डिपुटी कमिसनर सन्जीवकुमार यादवले जनाए अनुसार प्रारम्भिक अनुसन्धानका क्रममा लामा र उनका सहयोगीहरुको भाडाको घरमा २०/२२ दिन महिलाहरुलाई राखिने गरेको थियो । उनीहरुले त्यहीँ राखेर महिलाहरुलाई खाडी मुलुक पठाउने गरेका थिए । ती महिलालाई राम्रो काम लगाइदिने आश्वासन पनि दिने गरिएको बताइएको छ । लामाले उनीहरुको पासपोर्ट र अन्य कागजात शुरुमै लिने गरेकाले उनीहरु त्यहाँबाट बाहिर जान पाउँदैन थिए ।
पछि उद्धार गरिएका महिलाहरुले लामाले २ जना महिलालाई इराक र ५ जनालाई कुवेतमा लगेको जनाएका थिए । शनिबार प्रहरीले लामा र उनका सहयोगीलाई भेट्नका लागि काश्मिरी गेट नजिकै पुगेको बेला पक्राउ गरेको हो । लामाले प्रहरीसँग आफ्नो अपराध कबूल गरेको बताइएको छ । अनुसन्धानका क्रममा लामाले आफ्ना साला (श्रीमतीका भाइ) पनि उक्त कार्यमा संलग्न रहेको बताएका छन् । अन्य सहयोगीहरु भने तितरबितर भएको भारतीय प्रहरीलाई उद्धृत गर्दै सञ्चार माध्यमले जनाएका छन् ।
बेच्नका लागि लगिएका नेपाली महिलालाई यौन शोषण समेत गरिएको जनाइएको छ । भारतीय प्रहरीलाई उद्धृत गर्दै लामाको बारेमा भारतीय सञ्चार माध्यममा विवरण सार्वजनिक भएपनि स्वतन्त्र रुपमा भने लामाको गतिविधिका बारेमा नेपालका कुनैपनि निकायले केही पनि बोलेका छैनन् । (एजेन्सी)
