खनाल हटाउने र कार्कीलाई आइजीपी बनाउने खेलमा बिचौलिया अर्यालको सक्रियता
नेपाल प्रहरीमा आइजीपी हटाउनका लागि तानाबाना बुन्नेहरु सक्रिय हुँदैआएका छन् । नेपाल कम्युनिष्ट पार्टीको सरकार छ । तर आइजीपी सर्वेन्द्र खनाललाई हटाउनका लागि नेपाली कांग्रेसका नेताहरु ज्ञानेन्द्रबहादुर कार्की, डा. आरजु देउवा, पोखराका ब्यापारी आनन्द बतासहरु लागेका छन् ।
खनाललाई हटाएर कांग्रेस नेता ज्ञानेन्द्र कार्कीका आफन्त एआइजी पुस्कर कार्कीलाई आइजीपी बनाउने खेलमा त्रिकोण एडभर्टाइजिङ एजेन्सीका संचालक राजेन्द्र अर्याल पनि लागेका छन् । कार्कीलाई आइजीपी बनाउनका लागि अर्यालको एजेन्सीमार्फत् विज्ञापन बितरण गरी आइजीपी खनालबिरुद्ध समाचार प्रवाह गर्ने गरिएको छ ।
अर्यालले आइजीपी खनालका बिरुद्ध निर्मला पन्तको बलात्कारपछि हत्या गर्नेलाई पक्राउ गर्न नसकेको, ठेक्कामा अनियमितता गरेको, दुवईको कार्यक्रममा सुन तस्करसँग बसेको जस्ता प्रचार गर्नुपर्ने सर्त राखेर दिने गरेको समाचार छ । अर्यालले उनकै स्वामित्वको सेतो दरबार रेष्टुरेन्ट बालुवाटारमा बोलाएर आइजीपी खनालविरुद्ध समाचार दिने गरेका छन् ।
अर्याल मारवाडी ब्यापारीहरुसँग सम्बन्ध बढाउने, उनीहरुका बैंक, इन्स्योरेन्सहरुमा संचालक वा सल्लाहकारमा घुस्ने र तिनैका विरुद्ध मिडियामा समाचार प्रवाह गराउने र मिलाउने नाममा फाइदा लिने भनेर चिनिन्छन् । मारवाडी ब्यापारीका विरुद्ध आफैं समाचार दिने र आफैं मिलाउने भनेर बिचौलियाको काम उनले गर्दैआएका छन् ।
मारवाडी ब्यापारीका विरुद्ध प्रहरीलाई सूचना दिने काम पनि अर्यालले गर्दैआएका छन् । पछिल्लो समय उनले आइजीपी खनालका विरुद्ध मिडिया क्याम्पेनिङ गर्दैआएका छन् । यसरी आफैं धामी आफैं झाँक्री बन्ने उनको कर्तुत थाहा पाएपछि धेरै मारवाडी ब्यापारीहरु उनीसँग टाढिन थालेका छन् ।
पछिल्लो समयमा अर्याल आइजीपी हटाउन र कार्कीलाई ल्याउन ज्ञानेन्द्र कार्की, डा. आरजु देउवा, आनन्द बताससँग जोडिन पुगेका हुन् । उनीहरुकै लगानीमा एउटा अनलाइन संचालनमा आउन लागेको छ । जुन अनलाइनको जिम्मा शेरबहादुर देउवा प्रधानमन्त्री हुँदाका उनका प्रेस सल्लाहकार गोविन्द परियारलाई दिइएको छ ।
