केन्याको एक होटलमा आक्रमण, १५ को मृत्यु, सात सयको उद्धार

हाम्रो इकोनोमि

 

केन्याको राजधानी नैरोबीको वेस्टल्यान्ड जिल्लास्थित एक होटेल परिसरमा मंगलबार गराइएको आत्मघाती बम आक्रमण र गोलाबारीमा परी कम्तीका १५ जनाको मृत्यु भएको प्रहरी स्रोतले जानकारी दिएको छ ।

 

एक सय एक कोठा, रेष्टुरेन्ट, कार्यालय भवन र स्वास्थ्य केन्द्र समेत रहेको सो होटेल परिसरमा मंगलबार अपराह्न अल सबाब इस्लामिक आतंककारी समूहले आक्रमण गरेका थिए । विस्फोटक पदार्थ बोकेको एक आत्मघाती आक्रमणकारी होटेलमा छिरेलगत्तै बन्दुकधारीहरुले गोली प्रहार गर्न शुरु गरेको बताइएको छ ।

 

आक्रमणमा परी विदेशी नागरिकसहित १५ व्यक्तिको मृत्यु भएको एक प्रहरीले नाम नबताउने शर्तमा एएफपी समाचार समितिलाई जानकारी दिएका छन । मारिएका व्यक्तिमध्ये एक अमेरिकी नागरिक रहेको विदेश विभागका अधिकारीले जानकारी दिएका छन् ।

 

अमेरिकी विदेश मन्त्रालयले पनि एक अमेरिकी नागरिक मारिएको पुष्टि गरेको छ। सो मन्त्रालयका अनुसार मारिनेमा जासन स्पिन्डलर नामका मानिस छन् । त्यसैगरी दोहोरो दक्षिण अफ्रिकी राष्ट्रियता भएका एक बेलायती नागरिक पनि आक्रमणमा मारिएको र अर्का एक जना घाइते भएको बेलायती विदेश मन्त्रालयलाई उद्धृत गर्दै बिबिसीले जनाएको छ ।

 

आक्रमणको जिम्मेवारी अल–कायदासँग आबद्ध सोमालियाको अल–सबाब समूहले लिएको छ । सन् २०११ को अक्टोबरमा जिहादी समूहसँगको लडाइँमा सोमालियामा सेना पठाएपछि केन्यामा बारम्बार यस समूहले आक्रमण गर्दै आएको छ ।

 

सन् २०१३ मा नैरोबीको पश्चिमी गेटमा रहेको एक सपिङ मलमा भएको आक्रमणमा कम्तीमा ६७ जनाको मृत्यु भएको थियो । सन् २०१५ को अप्रिल २ मा पूर्वीकेन्यामा रहेको गारिस्सा विश्वविद्यालयमा सबाब समूहले गरेको आक्रमणमा कम्तीमा एक सय ४८ जनाको मृत्यु भएको थियो ।

 

सात सय व्यक्तिको उद्धार

यसैबीच आतंकवादी आक्रमणका कारण होटल परिसरमा फसेका करिब सात सय व्यक्तिलाई उद्धार गरिएको छ । आक्रमणका कारण होटलमा फसेका सयौं व्यक्तिलाई उद्धार गरिएको केन्याका राष्ट्रपति उहुरु केन्याटाले बताएका छन् ।

 

अल सबाब समूहका लडाकुले करिब २० घण्टा सो होटेल परिसर कब्जामा लिएका थिए । राष्ट्रपति केन्याटाले नैरोबीको होटल कब्जामा लिने सबै आक्रमणकारीलाई सरकारी सेनाले सखाप पारेको समेत जानकारी दिएका छन् ।

 

अधिकारीहरुले मंगलबार अबेर नै आक्रमणकारीहरुलाई परास्त गरिएको बताए पनि बुधबार बिहान गोली चलेको र विस्फोटको आवाज सुनिएको थियो । होटल आक्रमणमा कति लडाकु सहभागी थिए भन्नेबारे भने अझै प्रष्ट नभइसकेको अधिकारीहरुलाई उद्धृत गर्दै बिबिसीले जनाएको छ ।

 

राष्ट्रको नाममा टेलिभिजनमार्फत सम्बोधन गर्दै राष्ट्रपति केन्याटाले १५ मानिस मारिएको तर सात सय जनालाई सुरक्षित तरिकाले बाहिर निकालिएको बताएका छन् । राष्ट्रपतिले १५ जनाको मृत्यु भएको बताए पनि केन्याली रेड क्रसले भने मृतकको संख्या २४ भएको उल्लेख गरेको छ । एजेन्सी