निर्मला पन्त प्रकरण : यज्ञराज पन्तले पत्नी दुर्गादेवीलाई किन पिटे ? यस्तो रहेछ कारण
छोरीको न्यायका लागि लामो समय लडेकी निर्मला पन्तकी आमा आफ्नै श्रीमानबाट कुटिएकी छिन् । श्रीमान यज्ञरात पन्त र उनकी कान्छी पत्नी लक्ष्मी पन्तले अभद्र ब्यवहार गर्दै दुर्गादेवीमाथी कुटपिट गरेका छन् । निर्मलाकी आमाले डीएनए परीक्षणका लागि बुधवार रगतको नमुना दिएकी थिइन । घरमा सल्लाह नै नगरी डीएनए परिक्षणका लागि रगत दिएको भन्दै श्रीमान यज्ञराजले कुटपिट गरेको छिमेकीले बताएका छन् ।
परिवारको सल्लाहबिना नै रगतको नमुना प्रहरीलाई दिएको भन्दै निर्मलाका बुबा यज्ञराज र कान्छी आमा लक्ष्मी पन्तले उनीमाथी अभद्र ब्यवहार गरेका थिए । ‘घरमा सल्लाह नै नगरी किन रगत दिएको’ भन्दै बाबु यज्ञराजले कुटपिट गरेको छिमेकी मञ्जु भट्टले बताइन ।
निर्मलाको ‘भेजाइनल स्वाब’मा भएको डीएनए वास्तविक भए नभएको पुष्टि गर्न दुर्गादेवी पन्तले बुधबार महाकाली अञ्चल अस्पतालमा रगतको नमुना संकलन गरेर प्रहरीलाई दिएकी थिइन । त्यही बिषयमा श्रीमानले कुटेका छन् भने सौताले अभद्र ब्यवहार गरेकी छिन् । बिहान खाना पकाउँदै गर्दा श्रीमानले आफ्नो घाँटी अठ्याउँदै कुटपिट गरेको उनले बताइन ।
डीएनए परीक्षणका लागि रगतको नमुना संकलन गरिएको विषयमा असन्तुष्टि जनाउँदै श्रीमान र सौताले आफूमाथि दुर्व्यवहार गरेको दुर्गादेवी बताइन । ‘निर्मलाको स्वाबमा भएको डीएनए सही हो कि होइन भनेर जाँच्नुपर्ने माग हामीले नै गरेका थियौँ’, उनले भनिन् ‘बुवा र मेरा रगतको नमुना लिने कुरा थियो । म तीन–चार दिन जिल्ला प्रशासन कार्यालय गएँ तर बुवा नगएपछि हिजो बाध्य भएर एक्लै रगतको नमुना संकलन गरेँ ।’
निर्मलाकी आमाले छोरीको हत्या भएको ६ महिना बितिसक्दा पनि न्याय नपाइएको भन्दै राहत लिने निर्णयमा पुगेकी थिइन । तर बाबु यज्ञराजले भने राहत लिने बिषयमा आपत्ति मात्र जनाएनन् अभद्र शब्दसम्म बोले । ‘राहत बुझे तेरो मुखमा पिसाव फेरिन्दिछु’ निर्मलाकी आमालाई अभद्र शब्द प्रयोग गर्दै बाबु यज्ञराजले भने ।
धेरै समय न्यायका लागि लडेको र आन्दोलन पनि सेलाउँदै गएपछि राह बुझने निस्कर्षमा दुर्गादेवी पुगेकी थिइन । उनी अब धर्ना बसेर पनि न्याय तत्काल नपाइने बताउँछिन् । राहत बुझेर अनुसन्धानमा प्रहरीलाई सहयोग गर्नुपर्ने उनको तर्क छ ।
