कांग्रेसको चेतावनी– पर्यटन मन्त्रीले राजीनामा नदिए प्रधानमन्त्रीले राजीनामा दिनुर्पछ
प्रमुख प्रतिपक्षी दल नेपाली कांग्रेसका सांसदले नेपाल वायुसेवा निमगको वाइडवडी जहाज खरिद प्रकरणमा बारे छानवीनका लागि मार्ग प्रशस्त गर्न संस्कृति पर्यटन तथा नागरिक उड्यान मन्त्रीले राजीनामा गर्नुपर्ने बताएका छन् ।
राष्ट्रिय सभाको बुधवार बसेको बैठकको विषेश समयमा नेपाली कांग्रेसका सांसद रमेशजंग रायमाझीले पर्यटन मन्त्रीले राजीनामा गरेर अख्तियारलाई छानविनको बाटो खोलिदिनुपर्ने बताएका हुन् । प्रधानमन्त्री केपी शर्मा ओलीले मन्त्रीलाई राजीनामा नगराए प्रधामनन्त्री स्वयमले राजीनामा गर्नुपर्ने अबस्था आउन सक्ने उनले चेतावनी दिए ।
‘वाइडवडीमा मन्त्रीका कारण सरकारको वदनाम भएको छ । सदन र संसदीय समितिलाई गुमराहमा राखेका मन्त्रीले राजीनामा गर्नुपर्छ, अख्तियारलाई कारवाही गर्न बाटो सहज गरिदिनुपर्छ’रायमाझीले भने, ‘मन्त्रीलाई राजीनामा नगराए भोलि प्रधामनन्त्रीले राजीनामा गर्नु पर्छ ।’
सांसद रायमाझीले नेपाल वायु सेवा निगमका जहाज मर्मतका लागि सिंगापुर पठाउनु पर्नेमा मलेसिया पठाइनु गम्भीर भएको बताए । उनले पर्यटन मन्त्रीले बारम्बार कुरा फेरेर सदनलाई गुमराहमा राख्ने काम गरेको आरोप लगाए ।
कांग्रेसकै सांसद धनकुमारी खतिवडाले रेशम चौधरीलाई शपथ खुवाएर सरकारले संविधान र विधिको शासन विपरितमा काम गरेको आरोप लगाइन् । उनले सदनमा प्रधानमन्त्री हावी गरेको आरोप लगाइन् । ‘संसदीय समितिको प्रतिवेदन आएलगत्तै शाही आयोग जस्तै आयोग गठन गर्नु के यो सरकारको हतास मनस्थिती त होइन ?’ उनले प्रश्न गरिन् ।
आजपनि कांग्रेसले संसद अवरुद्ध गर्ने
प्रधानमन्त्री केपी शर्मा ओलीसँग प्रश्न सोध्न नपाए नेपाली कांग्रेसका सांसदहरूले संसद अवरुद्ध गर्ने भएका छन् । कांग्रेस सांसद भीमसेनदास प्रधानले आज मध्याह्न १ बजे बोलाइएको प्रतिनिधिसभा बैठकमा प्रधानमन्त्रीसँग प्रश्न गर्न पाउनु पर्ने बताए ।
प्रधानले भने, ‘कार्यव्यवस्था परामर्श समितिको बैठकले प्रधानमन्त्रीसँग प्रश्न सोध्ने र उहाँले जवाफ दिने कार्यसूची तय गरेन भने बैठक अवरुद्ध गर्छौं ।’ कार्यव्यवस्थाको बैठक मध्यान्ह १२ बजेलाई बोलाइएको छ ।
आइतबार संसदमा सार्वजनिक वक्तव्य दिएका प्रधानमन्त्री ओलीलाई प्रश्न गर्न नपाएपछि कांग्रेस सांसदहरूले बैठकमा नाराबाजी गरेका थिए ।
गगन र महतोले भने संविधान संशोधन नगरे संसद घेर्छौं
आइतबारको संसद बैठकमा बोल्न नपाएपछि प्रतिपक्षी नेपाली कांग्रेसका नेता गगन थापाले भनेका थिए, जबसम्म बोल्न दिइन्न, तबसम्म संसद चल्दैन। प्रतिपक्षी दलका तर्फबाट गगनले दिएको यो अभिव्यक्तिको समर्थन गर्दै राष्ट्रिय जनता पार्टी नेपालले प्रतिपक्षलाई बोल्न नदिनु सत्तापक्ष र सभामुखको गम्भीर गल्ती भएको निष्कर्ष निकालेको छ।
उसले प्रधानमन्त्रीको सम्बोधनमाथि प्रमुख प्रतिपक्ष दलले बोल्न पाउने अधिकार खोसेर सभामुख कृष्णबहादुर महराले गल्ती गरेको निष्कर्ष निकालेको हो।
राजपा अध्यक्ष मण्डलका शीर्ष नेता अनिलकुमार झाले आफ्नो पार्टीको धारणा पत्रकारहरुमाझ राख्दै संसदीय व्यवस्थामा प्रधानमन्त्रीको संसदको सम्बोधनमाथि प्रतिपक्ष दलले टिप्पणी गर्ने व्यवस्था रहे पनि त्यसो गर्न नदिएर सभामुख महराले गल्ती गरेको बताए।
संसद बस्नुको अर्थ सरकारबारे अरु दलले टिप्पणी गर्न पाउनु रहेको तथ्य प्रस्तुत गर्दै प्रधानमन्त्री बोलेपछि संसदमा प्रश्न गर्न पाउने व्यवस्था संघीय संसदको नियमावलीमा रहेको स्पष्ट पारे।
अब संसद घेर्ने, सरकारको साथ छोड्ने
राजपा नेता झाले आफ्नो पार्टी अब सरकारविरुद्ध चुप लागेर नबस्ने बताए। संसदमा बोल्दा प्रधानमन्त्री ओलीले संविधान संशोधनको विषयमा कुनै धारण नराखेकोमा असन्तुष्टि जनाउँदै उनले यो विषयमा पार्टीमा गम्भीर छलफल गरेर कडा कदम चालिने बताए।
‘हाम्रो पार्टीको माग सम्बोधन हुनेगरी तत्काल संविधान संशोधन नगरे सरकारलाई दिएको समर्थन फिर्ता लिन्छौं, संसद पनि घेर्छाैं’, उनले भने।
आइतवारको संसद बैठकमा प्रधानमन्त्रीको सम्बोधनमाथि प्रश्न उठाउन नदिएपछि कांग्रेस नेता गगन थापाले सभामुख पार्टीको कार्यकर्ताजस्तो व्यवहार देखाएको टिप्पणी गरेका थिए। उनले प्रधानमन्त्रीको सम्बोधनमा धेरै तथ्यभन्दा बाहिर कुरा आएको र यसले सार्वभौम संसदलाई गुमराहमा राखेको भन्दै सत्य बोल्न खोज्दा समय नदिएको गुनासो गरेका थिए।
