रेशम चौधरीलाई थुनामै राख्न सर्वोच्चको आदेश
टीकापुर घटनाको मुद्दामा पुर्पक्षका लागि थुनामा रहेका निलम्बित सांसद रेशम चौधरीले दायर गरेको रिट सर्वोच्च अदालतले खारेज गरिदिएको छ । चौधरीलाई कैलाली जिल्ला अदालतले कर्तव्य ज्यान, डाका चोरी तथा ज्यान मार्ने उद्योग मुद्दामा पुर्पक्षका लागि थुनामा पठाएको थियो ।
जिल्लाको आदेशविरुद्ध चौधरी उच्च अदालत दिपायल गएका थिए । दिपायलले पनि कैलाली जिल्ला अदालतकै आदेश सदर गरेपछि ०५ असार २०७५ मा चौधरीले सर्वोच्च अदालतमा रिट दायर गरेका थिए । सर्वोच्चले पनि तल्लो तहका अदालतको आदेश सदर गर्दै चौधरीको रिट खारेज गरिदिएको छ ।
सोमवार ईश्वरप्रसाद खतिवडा र पुरुषोत्तम भण्डारीको संयुक्त इजलाशले उच्च र जिल्ला अदालतको आदेश सदर गर्दै चौधरीको रिट खारेज गरिदिएको हो । यससँगै चौधरीले अब मुद्दाको पुर्पक्ष हुन्जेल थुनामै रहनुपर्ने भएको छ ।
