बम्जनको आश्रममै सञ्चलालको हत्या भएको रहस्य खुल्यो
‘तपस्वी’ भनिएका रामबहादुर बम्जनको सिन्धुपाल्चोक इन्द्रावती गाउँपालिका–६ बाँडेगाउँस्थित टोड्के जंगलमा रहेको आश्रममा प्रहरीले अनुशन्धान शुरु गरेको छ । फरेन्सिक विज्ञसहित जिल्ला प्रहरी कार्यालय र केन्द्रीय अनुसन्धान ब्युरो (सीआईबी) आश्रम परीशरमा खोजतलास गर्दा ३ सय मीटरको दुरीमा ९ वटा नुनको प्याकेटका खोल भेटिएको सिन्धुपाल्चोक प्रहरीका प्रहरी नायव उपरीक्षक बिमलराज कँडेलले बताए । उनका अनुसार आश्रमको गतिविधी निकै शंकास्पद छ ।
यससँगै आश्रमबाट हराएका भनिएका सञ्चलाल वाइबाको हत्या भएको आशंका झन बढेको छ । मृत शरीरलाई छिटो गलाउन नुन प्रयोग गरीन्छ । खोल भेटिएको ठाँउमा मानव कंगाल भने भेटिएको छैन । सञ्चलालका छोरा महेन्द्रले बाबु खोजीपाऊँ भनी बिहीबार जिल्ला प्रहरीमा जाहेरी दिएका थिए। सञ्चलालकाछोराले आफ्नो बुवालाई कुटेर मारेको आरोप लगाएका छन् ।
अनुसन्धानको क्रममा आश्रमभित्र केही शंकास्पद वस्तुहरु भेटिएको प्रहरीले जानकारी दिएको छ । ‘शुक्रबारदेखि हामीले आश्रमभित्र अनुसन्धान थालेका छौं । केही शंकास्पाद सामग्रीहरु फेला परेको छ’ जिल्ला प्रहरी प्रमुख एसपी मुकुन्द मरासिनीले भने, ‘अनुसन्धान अझै जारी छ । सञ्चलालको सोही आश्रममा हत्या गरी गाडिएको अनुमानका आधारमा अनुसन्धान अघि बढाइएको छ ।’
प्रहरीका अनुसार बमजनका अर्का अनुयायी सुरेश आले पनि यही आश्रमबाट हराएका थिए । त्यसैगरी आनीद्वय डोल्मो र चुन्मा पनि बाँडेगाउँकै आश्रमबाट बेपत्ता भएको उजुरीका आधारमा प्रहरीले खोजी थालेको हो । सबैभन्दा पहिले बाराको रतनपुरी जंगलमा तपस्यामा बसेका भनिएका बमजन सुरुबाटै विवादमा परेका थिए । उनीमाथि पुरुष अनुयायीलाई यातना र महिला अनुयायीलाई यौन हिंसा गरेको र ज्यानसम्म लिएको अभियोगसहितका उजुरी प्रहरीमा दर्ता भएका छन् ।
